Ayera diaranson dia 1 di februari durante rutina diario di trabou, empleado di Fedex Aruba sr. Jerry van der Linden a haye cu un situacion fastioso pero e la huza e situacion pa duna un bon ehempel na nos comunidad.
Riba su pagina di Facebook personal, Jerry ta conta e storia di kico a pasa ora cu e la bay haci entrega di un pakete na Noord. Na momento di entrega, no por a haya e persona di cas pa cual un señora a sali y generosamente a bay yama e bisiña pa e por ricibi su pakete. Na regreso pa su cas, e señora su slof a kibra y e la cai. E caida tabata uno fuerte unda e la herida su cara y un band’i pia. Jerry a keda corda e gesto di e señora y e susedido pa cual e la pasa awe pa wak con a sigi cu e señora y alavez hiba un regalito chikito p’e. Den su post, Jerry ta bisa: “Danki dios e ta ok!!!!!”
Bon Dia Aruba a haya e susedido aki uno ehemplar y no por a keda di comparti’e cu pueblo di Aruba. Compasion pa un cu otro ta algo cu mester ta parti di nos cultura.
Di parti Bon Dia Aruba nos kier a bisa: DANKI Jerry!
