ORANJESTAD – Algun dia pasa, a circula riba rednan social e rumor cu un cabay cu ta pertenece na un compania di tour a muri dilanti di un hotel reconoci na Aruba. Esaki a causa un consternacion entre e comunidad, pa motibo cu ta trata di un bestia cu a muri pa via di maltrato, y tambe cu tabata un ser bibo cu ta sinti y cu tin derecho.

Bon Dia Aruba a tuma contacto cu e compania di tour cu tin e nomber ‘Horses and Carriage Aruba’. Gianna Caterine Franco y Yamil Muyale, doñonan di e compania di tour, a splica cu e rumor ey no tabata berdad, e cabay no a muri ni tampoco tabatin ningun signo di maltrato.

Bon Dia Aruba a traslada te e luga unda e cabay tabata despues di e suceso, y a constata cu efectivamente esaki tabata un incidente cu a causa confusion entre e turistanan, pa motibo cu e trahado cu tabata encarga di duna e tour pa e turistanan tabatin poco tempo trahando den e compania di tour, y el a tuma un caminda cu no tabata parti di e tour.

Yamil Muyale a duna di conoce cu e incidente cu e turista a wak tabata algo normal, pero el a confundi y e noticia a bira viral, tocante e maltrato pa un bestia. El a splica cu e cabay a slip y despues trompica y el a cay sinta, esey ta algo normal cu lo por pasa cu un cabay. Manera Muyale a bisa, ‘nada grave a pasa’.

Muyale a comenta cu esey tabata e prome turno cu e cabay tabatin e nochi ey, e cabay no tabata cansa pa motibo cu esey tabata su prome tour di e nochi. Ora e suceso a pasa, ‘e cochero a baha for di e cabay y a yuda pa e lanta y wak cu tur cos tabata bon, pa e lo por sigui traha”, Muyale a bisa.

Prome cu esey, e turistanan cu tabata disfruta di e tour, a bisa e cochero pa subi nan cu e cabay pa nan yega te ariba di e subida di e hotel cu e cabay. E cochero, persona cu tabatin un siman trahando den e compania, a purba di subi cu e cabay, y e incidente a pasa pa motibo cu e cabay a slip.

Di mesun manera, Franco a splica cu nan compania cu ta traha cu turistanan ta contrata hende cu tin conocemento di cabay, ‘no cualkier hende lo por tin y cuida un cabay si nan no tin conocemento di e bestianan ey’, Franco a bisa.

Asina mes el a expresa cu nan como compania di tour tin 9 aña trahando na Paseo Herencia, y tambe el a expresa cu prome tabata e empresa di su tata, sr. Camilo Muyale, cu anteriormente tabata na Royal Plaza varios aña pasa.

Tambe el a agrega cu nan como compania di tour cu tin 3 cabay, y nan no ta subi hopi hende riba e cabay, y tampoco nan ta drenta te e parking lot di e hotelnan pa respet.

Franco a splica cu e cabaynan ta traha 3 ora so, desde 7or di anochi te casi 11or di anochi. Tin dia cu nan no tin hopi tour, como otro cu nan lo por haci te 3 tour den un anochi. Tambe a afirma cu nan ta bon cuida den e rancho, nan ta haya cuminda tres biaha pa dia, ‘e cabay mester tin un alimentacion stricto’, pa motibo cu nan ta sufri di colico di tripa, y si un cabay ta haya esey, e ta muri di biaha.

Tambe el a splica cu tur hende ta pensa cu e kitrin (obheto cu e cabay ta lastra y ta hiba riba su lomba) ta pisa y causa dolor. Sinembargo, esey no tin efecto dañino riba e cabay, pa motibo cu nan ta pensa cu ta un peso cu e cabay ta hiba riba su lomba, pero esey no ta e caso, sino cu ‘e cabaynan no ta carga e peso, nan ta trek e kitrin cu su pecho, p’esey nan tin wiel’.

Di loke ta trata e trahado cu a tuma un caminda incorecto, Muyale a expresa cu ‘tur hende lo por haci un fout, e trahado tin background di core cabay, no ta algo nobo p’e’.

Pa via di e suceso, Muyale a bisa cu ‘tur hende tin nan opinion, nos ta respeta esey, e mas importante ta cu e cabay ta bon, tur hende ta welcome pa bin y wak e cabay ‘Emperador’. Tambe el a agrega cu nan ta uza ‘Hoof’ cu nan ta pone abou di e pia di e cabay pa no slip, e mayoria ta di hero y nan ta uza di plastic, cu ta duna menos chens cu e cabaynan lo por slip y tambe ta mas confortabel pa e cabay.

Bon Dia Aruba tambe a tuma contacto cu e personal di e mall Paseo Herencia, sra. Judeska Bregita cu ta Executive Assistant, kende a duna un declaracion cortico bisando cu e mall no tin responsabilidad riba e incidente aki, pa motibo cu e compania di tour ta traha riba e caya dilanti di e mall, pero no paden di e mall.