(ElNacional/Reuters).  – E agencia internacional di noticia Reuters a informa diamars pasa cu e embahador di Venezuela na Organisacion di Nacionnan Uni (ONU), Rafael Ramírez, a ser destitui di su cargo pa gobierno Venezolano.  Sin embargo oranan mas laat Ramirez a nenga e destitucion.

Según un tuit cu a ser publica pa periodista Osmary Hernandez, despues di un entrevista na CNN, minister ramirez  no  a ser destitui di su funcion di embahador na  ONU.

Recientemente a surgi un polemica en torno di Ramírez, cu tabata presidente di Pdvsa prome cu el a bira embahador.

Fidel Ramírez Carreño, ruman di Rafael Ramírez, a ser vincula cu e empresa KCT, consorcio Venezolano señala pa participa den un organisacion di corupcion y labamento di placa. Den e caso tambe ta ser huzga e doñonan di Miami Equipment & Export Co, Luis Díaz y Luis Javier Díaz.

E familiar di e ex-embahador ta entre e beneficiarionan di e envio di miyones di dollar pa Merca, cu apoyo den factura falso.

Di acuerdo cu informacion, Ramírez Carreño tabata realisa e procesonan alegando servicio di consultoria presta pa funcionarionan di gobierno di Venezuela, y e empresa KCT Cumaná II Internacional a manda nan miyones di dollar atraves di Miami Equipment & Export Co.

Conflicto entre Chavista
Despues cu e ex-presidente di Pdvsa a keda señala cu vinculo cu funcionarionan di Pdvsa cu tabata busca pa corupcion, a surgi un serie di conflicto dentro di e filanan oficialista.

“Esun cu ataca mi mester pensa un poco, un poco so, pasobra Chavez tabatin mi 12 aña na su banda. Pero, ademas, ora e tabata muriendo el a yama solamente cuatro y ami tabata eynan. Asina ta, no laga ningun bin cu cuento cerca mi. Biba Chavez, nos lo vence!” asina Ramírez a precisa riba su cuenta di Twitter recientemente.

E tweet a keda publica despues cu miembro di e Asamblea Constituyente Iris Valera a manifesta den un entrevista, den cual el a lesa un comentario di Ramírez cu e no gusta pa nada.

Valera a referi na e publicacion di Rafael Ramírez riba e portal Aporrea, unda el e indica cu el a propone varios medida economico na presidente Nicolás Maduro cu no a ser aplica pa “factornan interno.”

Den su publicacion, e diplomatico a manifesta cu presidente Chávez tabata conoce e crisis cambiario y petrolero di Venezuela, pero e medidanan corectivo necesario pa alivia e carga fiscal y monetario cu Pdvsa mester a enfrenta desde aña 2012, no a ser aplica.