Embahador di Canada na China a bishita dos Canades deteni pa casi dos aña entre un disputa tocante aresto di un ehecutivo di gigante di tecnologia Chines, Huawei.
Gobierno Canades a bisa cu embahador Dominic Barton a reuni cu ex-diplomatico Michael Kovrig diahuebs y cu comerciante Michael Spavor dia 10 di november. Ambos ta encarcela desde december 2018, apenas algun dia despues cu Canada a detene ehecutivo di Huawei, Meng Wanzhou, kende tambe ta yiu di fundador di e compania. E tabata nan tercer bishita consular e aña aki.
No a revela informacion tocante unda e Canadesnan ta deteni ni bao ki condicion.
Canada ta acusa China di arbitrariamente detene e dos persona pa asina pone presion pa libera Meng, kende ta biba bao un forma di aresto domiciliario na Vancouver mientras e ta bringa un orden di extradicion Mericano pa enfrenta acusacion di fraude relaciona cu sancionnan comercial riba Iran.
China ta bisa cu Canada no tin derecho pa detene Meng, y cu Kovrig y Spavor ta sospecha di crimennan di seguridad nacional. Sinembargo, Beijing pa largo a vincula e casonan, exigiendo pa Canada libera Meng mientras no ta ofrece ningun acusacion specifico contra e dos Canades.
Aparentemente China tambe a sentencia otro dos Canades na morto y a suspende importacion di canola den un esfuerso aparente pa presiona Ottawa. Prome minister Canades, Justin Trudeau recientemente a referi na e accionnan di China como ‘diplomacia coercitivo’ y a papia cu presidente electo di Merca, Joe Biden, tocante traha hunto pa resolve e asunto.
Diabierna, vocero di ministerio di exterior, Zhao Lijian a renoba e acusacion di China cu detencion di Meng ta motiva politicamente pa Washington.
Oficialnan Mericano ta bisa cu Huawei por facilita spionahe Chines, cual e compania ta rechasa, y e administracion ta lobby Europa y otro aliadonan pa exclui Huawei y otro suministradonan Chines mientras ta upgrade nan rednan di telecomunicacion.
