Embahador di Rusia na Venezuela, Vladimir Zaemskiy, a nenga cu su pais lo ta planifica instalacion di un base militar na e isla La Orchila.
“Mi ta sigura cu esaki ta un di e cosnan inventa cu ta aparece den prensa di Rusia den ultimo dianan aki, di Rusia y di otro paisnan, e noticia ta di un supuesto plan, mientras cu bo sa, cu constitucion Venezolano ta prohibi e instalacion di cualkier tipo di base militar, asina ta cu specula riba e tema aki, ta parce mi un wega no hopi limpi,” el a expresa.
Pa motibo di e rumornan cu a genera na Colombia pa e presencia di e bombardero Ruso riba teritorio Venezolano, e diplomatico a manifesta cu ‘nan no mester tin miedo’.
“No ta trata di ningun provocacion, Rusia hamas tabatin plannan di domina mundo en general of algun area regional en particular, p’esey no tin ningun peligro desde e punto di bista di e intencion di gobierno di Rusia, den loke ta referi na e relacionnan cu otro pais,” el a sigura.
El a destaca cu di banda di Rusia, ‘nos ta dispuesto pa desaroya relacion di amistad cu tur pais di mundo y esey ta loke nos ta haci cu Venezuela’.
Vladimir Zaemskiy a splica cu e obhetivo di e ehercicio militar y e vuelonan den conhunto cu a ser realisa siman pasa na teritorio Venezolano, ‘tabata sigui exactamente un practica normal, di rutina cu tur e paisnan tin cu mantene un cooperacion militar’.
El a recorda cu varios avion a bishita teritorio Venezolano prome na aña 2008 y 2013, ‘esaki ta un practica normal’.
