Diamars anochi, na residencia di e Embahada Hulandes na Santiago, Chile embahador suplente, Sr. René Borghouts den presencia di invitadonan Olev Roode, Rodrigo Tapia Stocker, Frans Janssen y Monica Barendse a ricibi e delegacion participando na e Weganan Panamericano Santiago 2023.
Den su speech, sr. Borghouts a expresa cu e ta masha contento y honra cu e por a ricibi e delegacion di Aruba na e residencia di e embahada, algo sigur hopi special mirando e lasonan den Reino entre Hulanda y Aruba. Tambe su persona tabata tin palabranan elocuente pa Sra. Nicole Hoevertsz den su funcion como vice-presidente di Comite Olimpico Internacional. Na mes momento su persona a desea nos delegacion hopi exito y cu ohala nos por logra triunfa cu un of mas medaya pa Aruba den e ultimo siman di e Weganan Panamericano.
Secretaria general di COA, Sra. Nicole Hoevertsz tambe a dirigi algun palabra den nomber di e delegacion. Sra. Hoevertsz a gradici embahador suplente Sr. Borghouts pa e caluroso recepcion na e residencia aki na Santiago, Chile. Despues cu a introduci tur presente na e embahador suplente, Nicole duna un splicacion cortico riba e desaroyo di e Weganan Panamericano Santiago 2023. E delegacion ta sinti nan mes sigur honra den un momento asina special.
Por ultimo, Hefe di Mision, Sr. Jonathan Wever a haci entrega di algun regalito di Aruba Aloe na embahador suplente, Sr. Borghouts y su invitadonan na cual nan a keda masha contento mes.
