DEN HAAG – Recientemente Embahador di Trinidad & Tobago na Bruselas, Colin Michael Connelly, a haci un bishita di cortesia na Minister Plenipotenciario , Guillfred Besaril. Tambe presente na e encuentro tabata director interino di Arubahuis Glenn Ling.
Ademas di cera conoci cu otro, Embahador Connelly a probecha di e ocasion pa trata algun tema di interes mutuo pa tanto Trinidad como Aruba. Temanan manera entre otro maneho di desperdicio, economia y logistica na Aruba. Mirando cu Trinidad & Tobago tambe ta enfrenta e mesun reto cu Aruba riba esaki, embahador Connelly a haya e conseho na Hulanda pa acerca Aruba, Corsou y St. Maarten riba e topiconan aki.
Pa loke ta e topico di economia y logistica Embahador Connelly a splica Minister Plenipotenciario Besaril cu Trinidad & Tobago ta masha interesa riba e experiencia di Aruba cu Hulanda ( Port of Amsterdam y Rotterdam) riba e maneho di e wafnan di nos isla y a papia di posibel plannan di accion pa loke ta e tema. Riba e tereno aki tambe Trinidad & Tobago kier sa mas di e experticio di Aruba como un SIDS (Small Development States).
Minister Plenipotenciario Besaril a duna Embahador Connelly e consehonan necesario riba e terenonan discuti y a sigura e Embahador cu Aruba sigur lo ta dispuesto na duna e asistencia na Trinidad & Tobago y alabes na crea un clima economico den cual ambos Pais por sali beneficia.
Como recuerdo di e bishita hopi ameno, Minister Plenipotenciario Besaril a regala Embahador Connelly un buki di Aruba riba cual e Embahador a reacciona: “This gesture definitely entices me on going for a vacation to Aruba!”
