Recientemente Embahador di Kazakhstan Magzhan Ilyassov a haci un bishita di cortesia na Minister Plenipotenciario Guillfred Besaril. Embahador Ilyassov tabata compaña pa Ruslan Urazalin, Consehero Politico na embahada di Kazachstan.
Embahador Ilyassov a bin pa introduci su mes na Minister Plenipotenciario Besaril, como cu e embahada di Kazachstan na Den Haag ta responsabel tambe pa henter Reino Hulandes, pues tambe pa e paisnan Caribense di Reino y e islanan BES. Den cuadro di esaki, Embahador Ilyassov ta bishita tambe e Ministernan Plenipotenciario di Corsou y St. Maarten.
Minister Plenipotenciario Besaril, na e ocasion aki, a duna Embahador Ilyassov informacion tocante Aruba pa cu su relacion den Reino Hulandes y cu e pilar economico di e isla ta turismo, caminda Aruba ta ricibi anualmente mas cu 2 miyon turista, di cual mas cu 1 miyon ta “stay over”.
Finalmente Minister Besaril a bisa embahador Ilyassov cu lo ta bon si e haci un bishita oficial na Aruba pa asina conoce mas di cerca nos pais.
Embahador Ilyassov y Minister Plenipotenciario Besaril a intercambia regalo como aprecio di e bishita.
