Recientemente Embahador di Alemania Sr. Dr. Cyrill Nunn a haci un bishita di cortesia na Minister Plenipotenciario sr. Guillfred Besaril.
Ademas di cera conoci cu otro, Embahador Nunn y Minister Besaril a probecha di e ocasion pa trata algun tema di interes mutuo pa tanto Alemania como Aruba. Un di nan tabata turismo for di Alemania pa Aruba; kico ta e potencial di e mercado di turismo for di Alemania y con pa stimula esaki. Otro tema cu a wordo trata durante di e bishita tabata esun di enseñanza. Alemania ta dispone di hopi experiencia riba e tereno di educacion vocacional. E asina yama “Berufsschule” ta literalmente e orguyo di sistema educacional di Alemania. Un posibel colaboracion tin e potencial na trece industrianan nobo y innovativo pa Aruba, cu e meta na diversifica nos economia y alabes crea tipo y cupo di trabao nobo na Aruba.
Minister Besaril a labora riba e mision economico Aleman cu den cuadro di Energia lo ta e siman aki na Aruba, pues e presencia y interes di comercio Aleman pa cu nos Isla ta presente caba. Segun embahador Nunn e mision aki ya caba ta habri porta pa mas actividadnan economico y sigur ta algo hopi positivo. Aunke cu e enfoke aworki ta mas riba tereno di energia, tanto embahador Nunn como minister Besaril ta di opinion cu tin mas tereno riba cual por tin cooperacion entre Alemania y Aruba.
Embahador Nunn a termina su bishita gradiciendo Minister Besaril pa e encuentro ameno y a afirma cu mirando e hecho cu e ta embahador Aleman pa Reino Hulandes, e lo ta pronto na Aruba, probablemente den luna di februari 2022.
E potret ta cortesia di Cas di Aruba
