Consul Filipino (2).JPG
– Embahada Filipino na Mexico a bishita Aruba pa ofrece nan servicionan pa e comunidad Filipino cu nos tin akinan. Nan ta asumi hurisdiccion over Aruba, Corsou y St. Maarten pa ofrece servicionan consulatorio cu a cuminsa desde luna di Maart di e aña aki.
 
E consulado Filipino na Mexico tabata tin tres dia na Aruba haciendo un ‘outreach’ cual a termina ayera. Ta trata aki di nan prome bishita pa nos isla. Consul Filipino na Aruba, Sra. Amy Henriquez Mendez ta splica Bon Dia Aruba cu: ”Esaki ta un servicio pa e comunidad Filipino pa nan haya e oportunidad di cambia paspoort, reporta nacemento of casamento anto pa legalisa e documentonan.”  Esaki tabata e prome bishita na Aruba pa Sr. Mikhal de Dios, vice Consul y tercer secretario di embahada Filipino na Mexico, kende ta bisa:  ”Nos a bin ofrece servicionan di Consul pa e comunidad Filipino aki na Aruba anto esaki tabata un exito danki na e areglo di e consul Filipino aki na Aruba como tambe e comunidad Filipino.”
 
Cu asina hopi Filipino na Aruba, a lo menos 5.000 pa ta exacto, no ta tur ora tur hende ta riba e mesun liña pero esaki ta comprendibel. ”Parti di nos trabao tambe ta pa sigura cu tur hende ta trahando bon cu otro den union y harmonia. No tin echt ningun problema cu nos ta mira of pre mira desde nos punto di bista y si cualkier cos mester presenta, nos semper t’ey pa ofrece e apoyo necesario na e comunidad Filipino,” Sr. de Dios ta comenta.  Sr. Ruben de Jesus,’ Protocol Officer & Consular Assistant’ y Ferdinand Camacho, ‘Consular Assistant’, a acompaña Sr. Mikhal de Dios durante e tres dianan aki. Sr. de Jesus ta comenta cu e tabata un placer pa bishita Aruba anto cu e proceso a bay suave anto sin ningun problema.
 
Servicionan consultario
E cos di mas dificil pa e comunidad Filipino te ainda segun Sr. Mikhal de Dios, ta cu nan paspoort ta standard anto nan mester renoba esaki cada cinco aña. Sr. de Dios ta bisa: ”Como representante oficial di e gobierno di Filipina, nos ta ofrece servicionan cu e gobierno Filipino ta ofrece.  Ora cu e demanda bira regular, nos bishita ta bira algo regular. Nos ta bini aki pa ofrece nos servicionan y ta percura pa bin na tempo pa nan (comunidad Filipino) no mester por ehempel wordo gara cu paspoort venci. ” Pa continuacion di paspoort, e proceso ta hopi simpel pa e comunidad Filipino. Nan mester presenta  personalmente na e consulado hunto cu nan paspoort bieu, nan potret ta wordo saca eynan mes como tambe nan ‘fingerprints’ y ‘biometrics’ anto nan ta ricibi nan paspoort nobo no mas largo cu 1 luna. ”Nos  ta percura pa e paspoortnan nobo yega Aruba. Esaki ta e servicio cu nos ta ofrece na e comunidad Filipino como tambe atende na cualkier problema of preocupacion cu nan por tin,” Sr. Mikhal de Dios ta bisa. Ta hopi importante pa nan conoce e comunidad Filipino na Aruba personalmente segun Sr. de Dios pasobra den e manera aki nan por compronde mas miho e sentimentonan di e hendenan, kico nan ta pasando aden y den kico nan por yuda cu ne. 
 
Gradicimento
Consul Amy Henriquez- Mendez kier a  manda un danki na tur Filipino cu a bini aplica pa renoba nan paspoort y atende cu problemanan cu solamente Sr. Mikhal de Dios por a yuda soluciona of haya manera pa purba soluciona esakinan. Un danki special na e asistencia di FILCA (Filipino Community) bao guia di e presidente Lina Asaytuno y tur otro miembronan. ”Pa esnan tambe cu a ofrece diferente sorto di asistencia den e tres dianan aki cu cuminda y tur otro cos, un danki hopi grandi na boso como tambe na tur miembronan di mi staff Consular.”