Interes di partido ta bay prome

E partido grandi den oposicion a bay corte cu un caso dificil di gana. Ta pidi hues pa evalua y duna veredicto riba un decision gubernamental na e nivel mas halto, unda ta dificil pa dicta na fabor di e apelante. Sin embargo, a primera bista e decision contra cual a apela, no ta mustra fuerte. E autoridad cu a dicidi ta e alto comisario, cu ta eherce e autoridad na nomber di e ministro encarga cu Asuntonan General, cu ta e maximo responsabel pa orden y siguridad publico.

Den e carta unda e ta anuncia su rechaso, e unico cos cu ta parce un motivacion ta e anuncio cu su hefe (prome ministro) a dicidi cu ta su mes partido ta haya permiso pa bay tene parada diadomingo awor. Fuera di esey, e no ta motiva. E no por tampoco, pasobra tur argumento cu e uza, lo ta conta tambe pa e parada di e partido den gobierno. Si e bisa cu tin problema di siguridad, esey ta conta por lo menos mescos pa e partido berde. Si e bisa cu e no tin medio tecnico y humano pa por handle e parada, esey ta conta pa e otro tambe. Mas ainda, si nan ta afirma cu nan ta e partido mas grandi, cu orguyosamente ta pone mas hende riba caya, anto e problema di siguridad y di organisacion ta mas grandi ainda pa cuerpo policial.

Contal cu e unico argumento cu e tin ta cu e ta bisa cu su hefe, e prome ministro, a dicidi con e cos ta bay ta. Pero el a manda prueba di loke e ta bisa? No den e mesun carta en todo caso. Si bo kier pa esun cu ta haya e carta, por kere bo, bo mester duna prueba cu berdaderamente e prome ministro a tuma tal decision. E carta manera e ta elabora awor, ta muestra di ineptitud como funcionario publico cu ta carga un responsabilidad asina grandi. Lo el a mustra mas firmeza si el a bisa e prome ministro cu si e ta dicidi, anto e manda e partido opositor un carta di negacion. Pero nos ta custumbrando cu e cosnan aki.

Henter e asunto aki por cierto ta haci nos corda un eleccion den pasado, unda tambe e prome ministro tabata desea di asumi atrobe e poder di decision, cu el a pone den man di e alto comisario di e tempo ey. A bin un reaccion inmediatamente for di Den Haag y un rato despues e comisario tabata di regreso como esun cu tabata tuma decision den asunto di parada di eleccion. Den e caso aki nos ta mira cu e prome ministro ta tuma rienda cu el a delega na e comisario prome, sin mas, ni mas, y niun hende ta bisa nada. Lo ta pasobra e biaha aya tabata trata di un prome ministro di e otro partido grandi? Pakico biaha pasa a acusa e prome ministro di kier ta omnipotente y awor nos no ta tende bisa cu lo ta etico ni moral cu prome ministro, pasobra ta trata di su mes partido, no ta hala tras, pa laga e comisario tuma e decision. E por a mustra cu e ta ministro presidente di nos tur, y despues politico partidario. Pero por ta cu ta nos ta naief pa spera nobleza di e mesun persona, cu tempo e tabata den su welga di hamber, a lubida cu na e momento ey tambe e tabata ministro responsabel pa orden y siguridad publico, cu mester a bisa e persona Eman pa e ruim su baina y bay su cas, y stop di ofende y instiga contra representante di Rey.