Eman: “Seyo Nacional ta un distincion pa producto local”

Recientemente Prome Minister Mike Eman a firma un decreto pa establece e comision cu ta otorga ‘Seyo di Aruba” oficialmente. Relaciona cu esaki nos a ricibi e siguiente relato di gobierno.

Inmediatamente despues di a firma e decreto gubernamental estableciendo oficialmente e comision cu ta otorga ‘Seyo di Aruba’, Prome Minister Mike Eman a expresa su mes riba e balor cu esaki tin na diferente nivel. Na sede di e tienda Cosecha, ubica den edificio restaura di ex Museo Arkeologico, e mandatario a gradici e miembronan di e comision cu a tuma e responsabilidad, pero tambe Departamento di Cultura Aruba y gerencia di Cosecha. “Un parti importante ta pa duna un seyo na e productonan di artesania cu ta produci localmente pa asina esnan cu ta acerca nos bendedonan di souvenir y artesania tin un bista cla,” Premier Eman a splica.

“Nos ta kere cu e seyo ta importante pa artesanonan cu ta haci un esfuerso localmente pa produci e articulonan na Aruba mes, y hopi biaha cu material di Aruba mes y den e mercado di turismo, pero tambe mercado local.” Prome Minister a continua bisando cu “ta sinti un apetit grandi pa productonan cu ta produci localmente dor di nos artesanonan y nos kier duna nan un apoyo pa medio di e seyo aki cu ta distingui nan producto for di tur otro productonan cu ta bin di afo pa asina duna nan un bentaha den e mercado. Esey lo stimula mas artesano pa dicidi cu ta produci artesania localmente.”

E miembronan di e comision ta: Vicky Arens Tjon-A-Tjoe como President, Natusha Croes como representante di Ministerio di Cultura, Esther Gomes, Jody Tobman como representante di sector comercial, Valerie Willer y Isha Kock como representante di Aruba Tourism Authority. Pa Prome Minister Mike Eman tabata un honor di por a concretisa cu su firma riba e decreto gubernamental, un iniciativa cu a inicia durante Gabinete Mike Eman I pa medio di Minister di Cultura e periodo aya, Michelle Hooyboer.

Pa producto di turismo, e seyo aki ta importante tambe. “Den tur estudio cu nos a haci recientemente ta mira cu e turista cu ta bin Aruba, awor y den futuro, ta buscando mas cos autentico. Si e producto cu nan ta hiba cas ta autentico, e ta yuda crea e identidad propio di Aruba tambe,” tabata e palabranan di Premier Eman. Pa nos economia ta haci cu e producto ta produci localmente, e ta crea entrada pa nos propio hendenan y un nivel mas halto cu djis ora ta cumpra algo afo y rebend’e. “Den tur sentido e ta algo positivo pa Aruba y nos kier duna e apoyo.”