Eman: ‘ Plasterk a admiti cu erornan grave a wordo haci’

Nombramento di Alfonso Boekhoudt ta keda

Despues e declaracion di ambos Aruba y Hulanda cu e nombracion di Alfonso Boekhoudt como gobernador ta keda asina y cu lo no duna comentario mas riba e topico aki, gabinete Eman toch a saca un relato mustra dede.

Bou titulo ‘Minister Plasterk a admiti cu erornan grave a wordo cometi den nombracion di gobernador nobo’ e relato a drenta na prensa den e oranan ayera nochi. Ayera despues cu prome minister Mike Eman, hunto cu colega Benny Sevinger a topa cu minister di Asuntonan di Reino Ronald Plasterk na Hulanda, e noticia a drenta lihe cu nada lo no caba pa cu e nombracion di sr. Boekhoudt como e proximo gobernador. Ambos partido tambe a saca un declaracion hunto y a palabra cu lo abstene di mas comentario.

Sinembargo ayera nochi gobierno a saca un relato unda ta bisa cu minister Hulandes Plasterk a admiti den nan encuentro cu ‘enberdad e procedura no a bay manera mester tabata e caso’.

Sr. Eman ta comenta den e relato: “E reunion tabata necesario mirando e desaroyo peligroso pa Reino Hulandes y e ambiente di cual e tabata aden. For di 7 di october cu gobierno di Reino a bay over na nombracion di un gobernador nobo pa pais Aruba – cu no tabata e candidato di gobierno di Aruba – sin a cana e procedura corecto pa yega na tal nombracion – a surgi un situacion cu no tabata nada bon. Di un banda tabatin un proceso cu no a cana corecto, pero asina mes encamina pa gobierno Hulandes y na otro banda un candidatura hiba pa un persona cu no tabata e candidato di gobierno di Aruba. Gobierno di Aruba a notifica e persona en cuestion aki cu ta elegante pa e por a participa na gobierno Hulandes cu e no ta eligibel ya cu e no ta e candidato di gobierno di Aruba.”

‘Crisis grandi di confiansa’
Sr. Eman ta bisa tambe cu e ‘dos puntonan aki a conduci na un crisis grandi di confiansa di gobierno di Aruba den direccion di gobierno di Reino pasobra tin procesonan pa cana ora di nombracion di un gobernador’. Esakinan ta proceduranan cu a wordo ratifica den Conseho di Reino na 2002 unda ta poni cu e pais na unda ta nombra e gobernador, e candidato mester tin aprobracion di e gobierno di e pais ey, segun e prome minister. “Si Hulanda tabatin un problema cu un di nos candidatonan, den caso di Bermudez a surgi e tema di edad, pero Bermudez mes a kita esaki di caminda door di aclarea cu e por bay e full seis añanan, e ora e proceso cu a wordo ratifica y documenta den Conseho di Reino na 2002, ta bisa cu e candidato cu ta wordo proponi su nomber ta bay Conseho di Reino. Si tin un problema cu e persona, anto e Minister di Reino ta puntra e pais en cuestion pa bin cu nomber di un otro candidato. Pero, nunca por ta asina cu Conseho di Reino ta parachuteer un otro persona sin mas.”

Eman ta haya cu aki ‘Hulanda a perde tur respet y a viola den forma grave e acuerdo cu a wordo ratifica den Conseho di Reino na 2002’.

Hecho ta si cu awor violando reglanan ancra den Conseho di Reino, Aruba tin un gobernador nombra cu un KB cu ya caba a wordo firma pa Rey Willem-Alexander, segun Eman. Esaki a crea un situacion masha complica y delicado pa Reino Hulandes y e relacionnan, pero tambe pa Institutonan importante manera esun di Rey y di Gobernador, e ta bisa.

“Esaki tabata motibo pa den Conseho di Minister pensa bon kico ta e siguiente paso pa tuma y e decision a cay pa bin Hulanda y delibera cu Minister Plasterk y mustre bon cla cu locual a sosode no ta corecto y na mes momento busca solucion con pa sigui padilanti. Tur biaha bo busca un solucion, esey ta bira un convenio. Di un banda Minister Plasterk a admiti cu erornan grave a wordo haci den e proceso di nombracion di e gobernador nobo. Cu e pasonan manera e procedura ta defini no a cana su caminda corecto. Ta pesey cu awor nos tin un nombracion cu no ta cuadra cu e procedura. Di otro banda Aruba tin caba un nombracion cu un KB y aunke Aruba por a dicidi pa hiba e asunto aki Corte y na Raad van State. E caminda ey por a wordo encamina y ta conoci cu mas y mas Cortenan ta duna opinion riba asuntonan similar. Asina ta cu e caminda e di cana tey, pero e ora ta sigui un polemica dentro di Reino riba e tema aki. Ta di importancia fundamental pa tuma e miho decision den e caso aki.”

Eman a conta cu e combersacion cu Plasterk a tuma su curso, e tabata largo y intensivo prome a yega na un acuerdo cu Reino.