ORANJESTAD – Prome minister Mike Eman ta bisa cu e trabou pa pone e refineria na San Nicolas den operacion lo demanda un inversion di parti di Citgo di 500 pa 600 miyon dollar den tres aña. Y no tin duda cu lo haya e suma ey.
Esaki e mandatario a contesta ayera mainta, confronta cu e pregunta cu Citgo mes ta pasando den un situacion duro ya cu e compania madre esta PDVSA, ta den un crisis grandi, y cu ambos empresa ta pasando den un reto financiero grandi.
Segun prensa internacional, Citgo a pidi un ayudo di 100 miyon dollar pa start e trabou den e refineria na San Nicolas, pero ainda nan no a hay’e.
Sr. Eman ta bisa cu nan tabatin un reunion di consultoria cu un empresa Mericano envolvi den tur e proceso di negociacion cu Citgo, banda di nan conseheronan local. Tur e consehonan tabata ta cu “Citgo riba su mes ta un empresa sumamente stabiel na Merca”.
E ta menciona tambe cu e compania aki tin un cantidad di seis refineria, alrededor di 6 mil pomp di gasolin, y mas cu 20 terminal. E prome minister ta afirma cu niun di e conseheronan cu nan a yega di papia cu nan a duda cu Citgo ta bay tin e habilidad pa haya e financiamento pa haci e proyecto na Aruba un realidad.
Nan ta instancianan cu conocemento riba e materia aki cu a bisa cu nan ta hopi sigur di Citgo su stabilidad, segun sr. Eman. Mirando tambe e factibilidad di kico ta bay sosode na Aruba cu e rentabilidad di e refineria tanto pa Citgo y tambe pa PDVSA y Aruba, cu nan no ta duna cu Citgo lo haya e financiamento pa e proyecto aki.
El a conclui bisando cu Citgo ta un empresa hopi stabiel, pero no mester desconoce cu naturalmente tin un relacion estrecho cu PDVSA, y cada bes cu algo ta sali riba PDVSA ta wordo relaciona cu Citgo y vise versa.
