Den un video Rene Herde di partido AVP a reacciona riba e asunto di promesanan cu prome minister Mike Eman supuestamente a haci durante un encuentro cu comunidad Latino y cu a conduci na preguntanan di parlamentario Andre Bosman pa minister Hulandes encarga cu Asuntonan di Reino.
Bon Dia Aruba kier aclaria cu sr. Bosman ta mustra riba e video riba Youtube publica riba 11 di september. E video ta mustra prome minister Eman y minister encarga cu Asuntonan Stranhero Benny Sevinger. Sinembargo den e video e promesanan di esaki no ta asina concreto cu sr. Bosman ta indica den su preguntanan.
Un di su preguntanan tabata si ta ‘deseabel cu e paspoort di Reino Hulandes lo wordo duna como regalo pa wordo reeligi’. E minister concerni a pone bon cla cu Aruba no por cambia e ley riba su mes cu ta regla e rekisitonan pa obtene un paspoort. E proceso normalmente ta tuma un minimo di 5 aña, asina e ta splica. Y Aruba no mag di ni desvia di e ley Rijkswet voor het Nederlandschap ni e Paspoortwet. “E rekisitonan aki ta den caminda pa por duna un paspoort di Reino Hulandes como un regalo”, asina e minister Ronald Plasterk di Hulanda a contest, manera nos a publica ayera.
Sinembargo AVP ta desmenti cu nan lider a haci e promesanan. Esaki Rene Herde ta expresa cu niun biaha e prome minister Eman a menciona algo di paspoort. Den un video ayera sr. Herde ta dirigi su mes directo na e parlamentario Bosman indicando cu sea e parlamentario Hulandes a yuda e campaña di MEP cu e ‘mentira’ of ‘su amigonan di MEP a haci mal uzo di dje’ . Sr. Herde ta haya cu e parlamentario a duna e gobierno di Hulanda tambe un mal nomber como cu e minister Hulandes mester a duna contesta riba preguntanan riba un situacion ‘cu no ta existi’.
