E retiro di presidente di Parlamento for di fraccion di partido AVP no a cay solamente como un sorpresa, pero a crea un dilema pa e partido. Mientras cu Mike Eman, como lider di partido ta duna señal di ta den negociacion ainda cu e presidente, esaki no ta duna muestra di cu e acercamento ta tuma luga, te cu e por ta efectivo.
E motibo pa Eman trata e presidente cu cierto cautela ta cu e no por haci otro. E caminda pa baha un presidente di parlamento, y nombra otro, una bes cu e ta nombra den forma di un Decreto Nacional, no ta asina facil. Esey a pesar cu e reglanan concerniente den nos Constitucion no ta exclui esey; simplemente no ta pone regla mas aleu. Den e articulo III.12 di Constitucion tin dos inciso al caso, cu ta bisa: 1. Riba un proposicion pa dos miembro, pa cada un separa, suministra pa Parlamento, ta ser nombra via decreto nacional (landsbesluit) e presidente y vice presidente di Parlamento. 2. Tanten tal nombramento no a tuma luga ainda, ta actua como presidente e presidente o vice presidente nombra pa e periodo anterior, si esaki ta forma parti di e Parlamento nobo, o, den ausencia di tal persona, e miembro di e Parlamento nobo, cu entre e miembronan nobo cu tin asiento den Parlamento pa mas tempo, ta e miembro mas bieu den aña. Si tambe ta falta tal persona, ta actua como presidente e miembro mas bieu den aña.
Ta resulta anto cu nos constitucion, pa evita cu cada rato ta nombra otro presidente, no ta contempla mes e posibilidad di un otro presidente, dentro di e periodo cu e parlamento ta sinta den cierto constelacion, a base di e resultado di e ultimo eleccion, cu a duna legalidad na e parlamento su composicion. Naturalmente por sucede cosnan cu ta haci cu un parlamento ta pasa pa eligi otro presidente, manera incapacidad fisico, o mental di e persona pa sigui eherce e funcion. O un sentencia irevocabel pa un delito pa un corte di husticia. O un retiro pa e persona mes. Den e tipo di casonan aki tin e posibilidad pa eligi un presidente nobo den e prome reunion publico cu ta sigui. Esey ta regla den e Reglamento di Orden di Parlamento.
Manera e situacion ta awor, nos tin e caso di un presidente di Parlamento, cu solamente a cambia di posicion pa loke ta su fraccion; e no ta parti mas di e fraccion mayoritario cu ta sostene gobierno. Pero nos leynan no ta bisa cu e presidente di Parlamento, o vice presidente, mester pertenece na e fraccion mayoritario, o na un cierto partido. Por lo tanto, si no tin cambio grandi manera describi aki riba, cu ta hustifica e eleccion di un presidente nobo, lo mester inventa un argumento basta bon pa kita e presidente di su puesto, prome cu e proximo eleccion.
E dolor di cabes no ta tanto e presencia di e presidente den e puesto, si e sigui haci su trabao manera mester ta. Pero ta net eynan e problema ta sinta: ta spera di banda di gobierno cu e presidente ta ‘tene oposicion na cadena’, bay masha estricto cu nan pa loke ta ocasion pa dirigi palabra, trata di pospone peticion di reunion pa trata asunto urgente mas tanto posibel, permiti simpatisante di gobierno tene demostracion di apoyo riba tribuna sin interveni, etc. En corto, ser un ‘team player’ pa e fraccion gubernamental. Esey ta exigi tambe di antemano consulta strategia cu e fraccion gubernamental coreografia di reunion pa limita e posibilidad cu oposicion por gana punto. Tur esey awor ta bira mucho mas dificil pasobra no por consulta mas den confiansa cu e presidente.
Y net awor ta bay trata algun tema cayente unda dominio riba e proceso den sala pa banda di gobierno ta primordial. Pa cuminsa cu e caso di e acuerdo encuanto e refineria. Presidente di Parlamento a laga sa cu nan no a haya ningun documento ainda… Esey ta fastioso pa gobierno, pasobra loke nan ta desea di haci ta bin parlamento cu un ‘roadshow’, laga hala di ‘experto’ declara tur sorto di cos bunita, pero no entrega documento pa oposicion no haya nada den man, pero si forsa un decision di Parlamento cu ta apoya e acuerdonan firma. Cu esaki ta pone oposicion tambe den un situacion fastioso, pasobra vota pro lo significa ignora tur interogante cu tin awor, y vota contra ta duna gobierno oportunidad pa haci propaganda cu ‘oposicion a vota contra; nan ta contra progreso di Aruba’.
Igualmente e tratamento di e ley di ‘all-inclusive’ cu a lanta basta discusion. E problema awor ta con pa trata nan, cu un presidente cu tabata, como unico, contra e reapertura, y tin su preguntanan tambe encuanto e ley di ‘all-inclusive’. Ta p’esey Prome Ministro ta anda cu cuidao, pasobra e no ta den posicion di simplemente exigi… Talbes pa prome biaha den historia parlamentario di Aruba, nos por tin un presidente cu ta actua sin distincion di partido. Interesante…
