Bida pa Ema ta den un transicion continuo. E hoben di 20 a caba di gradua VWO y ta wardando pa e ceremonia di graduacion pa sigui su rumbo pa Hulanda. No pa studia, sino pa traha y biba como un boluntario na ‘t Bak Atelier, un programa di e European Solidairity Corps pa asina e por reflexiona riba su futuro. Pasobra, aunke Ema ta cla pa habri su halanan, unda exactamente e kier bula bay no ta sigur.

Motibo pakico Ema kier un ‘break’ cu hopi conoce como ‘gap year’ prome cu sigui cu su estudio superior no ta uno storia comun. E hoben, cu no tabata un alumno extraordinario den MAVO, a logra caba HAVO y VWO consecutivamente danki e hecho cu el a reconoce finalmente cu su forsa pa studia ta den su mes. Y como tal, ta manera cu e pandemia di COVID-19 tabata manera un ‘blessing in disguise,’ of bendicion. Pasobra ta den e lock down cu Ema a realisa studia riba su mes tabata mucho mas efectivo cu atende les den persona.

No a gusta su curpa

Ema, kende a nace Emanuel Benjamin Albert Koolman ta un trans. For di chikito el a sinti diferente y a kere cu e ta homosexual, of ‘gay.’ E realisacion cu e ta identifica como femenino ta durante adolescencia ora cu curpa a desaroya. “Mi semper a kere mi ta gay, pero wow, ora e curpa a cuminza cambia, mi no a gust’e.”

E realisacion cu e ta sinti su mes mas un ser femenino no a conduci na conflictonan na scol. Cualkier reto cu Ema por a confronta tabata mas bien na nivel di scol, di studiamento. Su periodo na MAVO no tabata mucho yamativo. Su scol basico no a mira e necesidad pa laga Ema haci e test pa Colegio Arubano, y casi por bisa cu e proyeccion di e scol tabata na su lugar, ya cu Ema no tabata e alumno cu e miho resultadonan. Awor e hoben ta realisa cu mas bien e tabata ferfela su mes den klas. Practicamente e no tabata haya un reto pa haci su testnan.

Despues di caba MAVO, el a bay Colegio San Nicolas, awor Colegio Nigel Matthew. E no tabata un momento facil pasobra pa un of otro manera Ema no a por a drenta den e ritmo di e sigui les. Te ora cu e pandemia a dal y Aruba a bay den lockdown. Ironicamente, aunke e no tabata e facilidad na cas, Ema a haya oportunidad pa sigui les y siña riba su mes den un camber den e cas bandona di su welonan. No por a biba den e cas pasobra e dak tabata kibra, pero e un camber si tabata bon y hasta cu airco. “Na Colegio San Nicolas tin cuater periodo di School Examen (SE), y mi ta corda mi tabata asina cansa. Pero ora cu a bin e lockdown, mi a sinti mi mes asina alivia. Mi por a bay den e camber na e cas y isola mi mes.”

Den e espacio ey, Ema a descubri cu e mes por a haya su habilidadnan pa studia, sin mucho sosten di docentenan. E periodo di pandemia a dun’e un ‘booster’ pa e por a studia y logra su diploma di HAVO. “Cierto momento mi a reconoce cu mi por siña hopi riba mi mes, sin docente, den un forma mas eficiente.”

Colegio Arubano

E siguiente tabata dicidi kico pa haci despues. Su intencion tabata pa bay studia afo, pero e no tabata sa unda. En todo caso, e no tabata kier a bay un scol cu ta na Hulandes. “Mi kier a haci un estudio na Ingles. Pero e estudio cu mi kier a haci mes, cu ta Politics and Economics na Utrecht tabata rekeri VWO.” Riba dje, Ema kier a cuminza cu su tratamento di hormona pa su proceso di transicion na Aruba mes. Asina el a dicidi pa keda pa keda Aruba, a cuminza cu su tratamento y cu e confianza cu VWO ta dun’e mas oportunidad di scoge un estudio na Ingles despues.

Pero e biaha aki si e medidanan contra COVID-19 a haci un impacto. E sistema di duna les, tabata algo cu Ema no tabata custumbra cune y tabata mira e otro alumnonan habri nan buki y traha, y “ami tabata perdi, sinta eynan manera un bobo.” A resulta cu Ema a perde diferente posibilidad di comunicacion cu su mentor y otro docente pa e sistema di comunicacion via e-mail. E no tabata na altura di e ‘schoolgids’ cu ta riba website di school. “Awor mi ta hay’e pret, pero e momento ey e tabata laga mi perdi.

Y ningun hende realmente a hala su atencion na prome instante. “Mi a cualifica esaki cu ta manera ta spera independencia di nos. E experiencia di MAVO pa HAVO ta otro, pasobra tur tabata yuda otro y nos tabata haya guia. Pero di HAVO pa VWO, e tabata un otro experiencia.” Aunke un con-rector a bis’e cu ‘aki bo mester siña ta independiente,’ Ema ta kere cu Colegio por haci mas pa yuda alumnonan nobo asimila hopi miho den e scol pa evita problema innecesario.

Hormona

Locual a haci e experiencia pio tabata cu esey tabata e momento cu el a cuminza tuma su tratamento di hormona. Pero pa por a tuma e hormonanan, e mester a baha peso. Den otro palabra, ata Ema na un scol nobo, no ta compronde e sistema, mester baha peso y tuma hormona. “Esta un horor, cu tur e emocionnan ey. Ora mi tin stress mi ta come. Corda awor cu mi tin stress, mi no por come, y mi a haya pensamento di suicidio. E ta un milager di Dios cu mi a logra caba VWO,” Ema a bisa na harimento. Awor e ta hari, pero e momento ey el a haya atencion di e trahado social, pasobra e tabata den un condicion emocional hopi serio. Hasta prome cu ultimo examen. Pero asina mes, Ema a logra, danki na su habilidad pa enfoca su mes kico e mester haci.

Un mama dedica

E persona cu mas a yud’e pa caba scol tabata su Mama, cu a pesar di nan situacion financiero precario a haci e sacrificio pa percura cu su yiu por caba Colegio Arubano. Aunke su mama ainda tin dificultad pa acepta cu Ema ta un transsexual, e hoben sa cu e tin un mama cu ta stim’e, a siñ’e e balor di boluntarismo for di chikito y cu netamente e custumber ey pa yuda otro, ta bay ta su ‘stepping stone,’ pa futuro. “Ken sa? Kizas despues di e un aña na Hulanda lo mi por dicidi pa studia na Costa Rica tambe,” Ema Koolman a bisa na harimento. Di otro banda, un di e metanan pa ‘t Bak Atelier ta pa brinda e hobennan e oportunidad pa domina Hulandes miho. Ken sa cu Ema lo transiciona toch pa e sociedad Hulandes, sigur pasobra awor e lo tin su mesun camber, algo cu nunca el a experiencia prome. Un otro transicion.