Arte ta un manifestacion di actividad humano cu ta expresa un vision personal. Di e manera aki por duna e herment pa e hobennan por expresa miho nan emocion, como artista of como publico, locual ta aporta hopi cos positivo pa nan formacion.

Atelier’s 89 ta un fundacion cu ta promove e desaroyo di arte en general, nan hunto cu Farpa y Cede Aruba ta organisa e tayer ‘Teatro den Bario’, dirigi pa hobennan entre 12 y 19 aña, cu lo cuminsa e proximo 2 di september na tres bario distinto, Centro Bario Playa Pabou, Centro di Bario Dakota y Brasil cu un duracion di tres luna.

Asina a duna di conoce Elvis Lopez di Atelier’s 89 durante un entrevista cu Bon Dia Aruba. El a splica cu e aña aki nan ta haciendo 4 tayer na mesun tempo y cu ekiponan nobo cu nan a adkiri door di un donacion cu gobierno a duna pa nan por traha di un miho manera.

Dialuna awor, el a menciona cu nan ta bay cuminsa cu un proyecto di teatro cu ta bay den barionan y segun Lopez a bisa tin hopi mucha cu no por yega eynan pa motibo cu nan ta muchanan di menos recurso.

“E proyecto aki ta hopi special, hopi unico tambe den su genero, pasobra e ta bay ta tres luna largo y tambe ta bay ta gratis”, Lopez a sigura.

Di igual manera, Lopez a comenta cu e proyecto aki ta esun mas grandi cu nan tin, pa motibo cu ora e ta caba, semper den un exposicion of den un obra teatral, esey ta haci cu e muchanan ta drenta den contacto cu publico, cu hende y ta siña conoce nan presentacion y con nan ta bay papia.

Lopez a sigura cu dia pa dia, Aruba ta bay mas atras tocante arte. El a menciona e resultado cu Unesco a duna di loke ta trata e muchanan cu ta bay haci un estudio di voortgezet onderwijs, specificamente un estudio despues cu nan a bay EPI of MAVO y nan ta bay studia afo, e resultado ta cu 3% di nan ta ricibi un studio avansa.

“Hopi di e muchanan di aki nunca tabatin contacto cu arte, pa motibo cu nan mama y tata tampoco a haya esaki; y pa bo cambia un generacion bo mester implementa un Traimerdia di arte”.

El a señala cu arte ta hopi importante, pero akinan na Aruba nunca a wordo considera pa nada. E porcentahe cu nan ta alcansa di e comunidad ta minimo di henter e poblacion y door di esey el a bisa cu mester di Traimerdia cu arte den bario, of ‘asina como ta existi un Lotto pa Deporte’.

Lopez a manifesta cu esey ta e unico manera pa purba di rescata loke a bay perdi caba y ademas di purba di influencia e muchanan pa nan ta un poco mas humano, duna pa nan un oportunidad pa nan mes por siña un tiki mas di un otro cos cu nan no sa. Ademas di esey, despues cu nan a experienci’e nan no ta bay bira artista, pero e pensamento cu nan ta haya ta otro.

El a papia tocante sponsornan y apoyo cu otro fundacion of organisacion di deporte y cultura ta haya semper pa bay afo, pa bay hunga baseball of pa carnaval. E problema ta cu henter comunidad ta bay keda atras, pa motibo cu e mama y e tata no ta educa nan yiunan pa arte.

Tambe ta existi e problema cu – manera el a bisa – e Traimerdia no ta conta cu personanan capacita pa traha arte cu muchanan. “No tur maestro ta siña arte, por ehempel Maria College tin 1.500 mucha y 2 docente di arte so. Nan tin cu haci canto, teatro, baile, tur cos. Mester di mas hende pa haci esey”, Lopez a finalisa.