E problema ambiental ta grandi y maneho di medio ambiente ta wordo considera como e Cinderella di e ultimo gobernacion nan. Falta di un ley stricto riba ordenansa teritorial; compromiso y proteccion di areanan clave pa salvaguardia nos naturalesa; preocupacion pa destruccion discrimina di e mangelnan; dump satura cu ta contamina nos medio ambiente y ley di medio ambiente cu ainda no a keda cla, ta refleha e magnitud di e problema aki.
No ta existi un maneho cla y preventivo pa evita mas calamidad y sacrificio riba nos recursonan natural. Loke nos ta wak ta un accion repentino ora cu pa ehempel un derame di azeta ta presenta cerca nos costa y di repenti e departamento (nan) concerni ta bin dilanti. “E ta invisibel y nos tabatin un departamento hopi visibel”. E ta referi na VROM un departamento cu a dura casi 19 aña y cu mayoria di nan Elton Lioe A Tjam a fungi como su director.
Lagando un banda su pechi di politico como lider di ABO, pero a base di su experiencia y profesionalismo riba e ramo di ingeniero medio ambientalista, e ta haya cu e punto cu mas ta wordo neglisha di nos medio ambiente ta e falta di educacion y amor pa locual nos tin. Hopi hende ta considera Aruba como un isla seco cual naturalesa no ta bal nada.
Tin biaha nos ta wordo mal compara cu paisnan cu selva y berde y variedad di animal grandi; ya cu esey pa nan ta naturalesa. E ta un concepto eroneo; ya cu tur pais y region tin su mesun tipo di medio ambiente y e ta interactua cu pueblo. E tipo di pensamento negativo of conocemento eroneo aki ta conduci cu facilmente nos ta rosa tur cos. Tambe facilmente nos pensamento ta wordo reemplasa cu klinker y cu decoracion ta tur cos, na luga di cuida locual ta di nos.
“Nos no tin cu menosprecia locual nos tin como naturalesa. Ya cu tin hopi hende cu ta cana den nos mondi sin ripara cuanto bunitesa tin y cuanto animal tin.”
Diferencia entre departamentonan antes y awor
E diferencia entre e departamento di VROM antes y e departamento actual, Departamento di Natura y Medio Ambiente ta cu VROM tabata un departamento di maneho, pero indirectamente nan tabata forma parti di obranan publico (Publieke Werken, awor DOW). Nan tabata guia, structura y controla e maneho structural unda a wordo construi casnan y careteranan tendiendo na cuenta cu ordenansa teritorial. Asina sr. Lioe A Tjam ta splica.
Un aspecto cu e ta considera cu hopi hende ta lubida ta cu ordenansa teritorial tin di haber cu e parti fisico. Mientras cu e maneho ambiental ta bin riba dje, pero nan mester bay man den man. “Bo no por bisa: mi ta bay construi algo pazuid, sin tene cuenta cu e otro consecuencianan ambiental of pa e hendenan.”
Un parti esencia di VROM su trabou tabata conscientisa nos pueblo. E ta asina cu mas nos pueblo sa, mas e lo tin amor pa su medio ambiente y su naturalesa. Tambe e muchanan ta bay balora loke nan ta bay hereda y locual ta di nos. Nan tabatin programa di conscientisacion den medio di comunicacion te hasta den scolnan; y tambe plan riba vivienda, etc.. locual no a sigui mas. Antes e casnan tabata wordo construi teniendo cuenta cu direccion di biento y cu material y facilidad cu tabata garantisa paso di biento pa saca aire cayente y trece frescura den e cas. Esaki no ta sosodiendo mas y nos ta sigui construi pensando riba airco, sr Lioe A Tjam ta bisa.
E departamento cu a bin despues di VROM e ta lamenta cu a base di su experticio y cu e ta biba na Aruba, sr. Lioe A Tjam no ta wak e trabou cu nan ta desplegando. “Mi no ta wak nan, mi no ta scucha nan y leu leu ora cu e sapato a bira un tiki preta bo ta scucha e director bay grita cu e no ta haya e cooperacion ni e sosten”. E pregunta cu ta surgi ta: dicon bo a keda keto tanto tempo?, e ta bisa.
Urbanisacion y energia berde
E ta haya cu actualmente nos informacion ambiental ta ‘puro show’. Nos isla a cuminsa yena di panel solar te hasta a bin cu campaña pa pone na domicilio; pero solamente un grupo chikito so por cubri e gasto aki.
“Tin un batayon na aeropuerto; pero pueblo no ta cosecha di esey”. Mientras tin molinanan di biento pero pueblo no ta wak un reduccion den nan recibo. E ta haya cu ora cu gobierno kier incorpora proyectonan relaciona cu energia berde of alternativo, e tin cu bin na beneficio tambe di pueblo.
Un problema cu mester tene cuenta ta urbanisacion cu ta na moda; y aunke ta wordo considera cu e ta bunita, e ta haya cu e ta fout. “No mester lubida cu ser humano ta forma parti di naturalesa te hasta den Bijbel esaki ta para”. Den naturalesa nos por haya cuminda, habitat te hasta e manera di recrea y relax nos mes. Pero tin un falta di conocemento y falta di respet pa nos naturalesa, e ta bisa.
Sr. Lioe A Tjam ta haya cu ta un contradiccion grandi cu mientras pa ehempel molina di biento ta wordo bon propaganda pasobra e ta bon pa medio ambiente. Pero na e mesun tempo nos pueblo ta gastando basta coriente pasobra e cas ta calor y nan ta pone airco traha henter dia; y compania WEB mester aumenta su capacidad locual ta nifica mas gasto. “Bo no ta spaar nada”.
P’esey e tipo di programa aki mester bay cu un bon plan di conscientisacion. Pero tambe pueblo tin cu realisa cu mas nos biba den bon relacion cu nos medio ambiente, mas relaha nos lo por ta, ademas di otro beneficionan. Ya cu ora nos ta rosa tur cos nos ta contribuyendo pa Aruba bira mas caluroso. Tambe tanto caminda ta wordo construi supuestamente pa contribui cu e fluho di transporte tin su impacto. Mientras cu si di otro banda gobierno ta percura pa bo transporte publico ta mas eficiente nos lo tin menos congestion den trafico, menos gas carbonico (CO2) of polucion, menos caretera, menos gasto, y accidente di trafico y menos efecto riba kentamento global.
Sr. Lioe A Tjam ta conclui cu nos maneho ambiental no a yuda Aruba den nada. Te hasta e ta tribi di bisa cu mas bien a trece hopi mas problema cu den futuro e lo ta un dolor di cabes pa atende cu cierto aspectonan di nos desaroyonan.
