Eltienne Yarzagaray ta conoci na Aruba pa u carera musical gospel y Eltienne ta docente tambe na Sint Paulus School. Eltienne ta conta Bon Dia Aruba con su carera den e mundo di musica a cuminsa y con e ta combina su dos mundonan pa yuda mehora enseñansa di su alumnonan.

Di chikito Eltienne a lanta den un cas hopi musical. E ta conta cu su mama tabata un drummer y semper el a gusta canta y semper e tabata gusta participa den e presentacionnan di scol. Den su hubentud su a bida a cambia hopi pasobra el a pasa den un infancia hopi fastioso door di e divorcio di su mayornan y esaki a haci un impacto ariba su bida.

“Mi a encontra mi mes sirbiendo Señor y esey a yuda mi hopi mes pa mira bida full diferente. Prome mi tabata echt kere cu mi no lo bay tin un futuro exitoso y conociendo e caminda ey a duna mi un proposito y mi a bisa Dios cu mi lo bay duna tur mi talento, tur loke mi tine pe”, el a bisa.

Cu 13 aña Eltienne a cuminsa skirbi su cancionnan y el a cuminsa bay les di piano. E ta conta cu esey a yudele den su carera musical y cu 19 aña el a saca su cancion, Amor di un Tata, y for di e tempo ey su carera musical gospel a cuminsa. Hunto cu un ekipo el a realisa diferente produccionnan y asina el a haci diferente conciertonan rond di Aruba y tambe internacional.

“Pa mi e ta un exito grandi. Mi a gana diferente premionan y esey tabata pa mi hopi grandi pasobra mi nunca no a pensa mi carera como musico ta bay ta asina grandi. Pero no esey so, impactando hopi hende den un forma positivo tambe”, el a menciona.

E ta sigui conta cu mientras e tabata siña toca piano el a dicidi tambe pa habri su mesun scol di musica y asina duna muchanan les di piano. “Mi tabatin hopi mucha, mas cu 40 alumno y eynan a cuminsa algo den mi cu mi ta gusta siña hende algo, mi ta gusta siña hende algo nobo”, Eltienne a agrega.

Despues di caba scol na Aruba el a dicidi di bay Hulanda y sigui su estudio den Sociale Pedagogische Hulpverlening, un profesion un biaha mas pa yuda hende. Pero den esey el a cambia carera y el a bay studia teologia cual tabata algo hopi interesante pe. Pero na final su destino tabata pa bin back Aruba y studia pa docente di scol.

Eltienne tin 7 aña dunando les, pero e no ta algo cu semper e tabata sa cu el lo bay haci. E ta conta cu su bisawela, ora e tabata chikito, tabata bis’e cu el lo bira un meneer di scol ora cu e bira grandi. Pero e mes nunca no a pensa mes cu el lo bira un meneer di scol. E ta bisa e tabatin otro visionnan pa su bida, pero door cu e gusta yuda hende, inspira hende y siña nan cos nobo, e profesion di docente ta perfecto y ta marca tur e lista cu e tin.

“Tin biaha mi a puntra Dios dicon mi infancia tabata traumatico, pero tur cos den bida mi ta compronde cu tin un liña pakico tur cos ta pasa y trahando den enseñansa mi a bin realisa pakico, pa mi por sinti hopi di loke e muchanan ta sinti of ta pasa aden. Mi por compronde nan, mi por papia cu nan y pa mi esey tabata un contesta ariba e pregunta cu semper mi tabatin, pakico”, el a agrega.

Eltienne ta gusta trece musica den su lesnan. E ta conta cu pa su ultimo examen el a haci un investigacion di musica den enseñansa y el a haci su tesis ariba e parti di influencia di musica ariba e muchanan. El a haci diferente proyectonan, treciendo diferente metodonan con por involucra musica den klas cu e muchanan.

“Esey tabata algo hopi great pa mira con bo por cambia un les usando e musica. Bo ta yega mas cerca di haya e atencion di e muchanan y tur dia nos ta haci diferente ehercicionan musical y esey pa mi ta algo cu mi ta gusta masha hopi mes. Despues di cada les nos ta haci algo leuk cu musica. Pa mi, mi profesion como docente y profesion como cantante ta mescla hopi bon. Mi ta gusta esey y mirando back, semper mi muchanan tabata involucra cu hopi cosnan musical”, el a conta.

E ta splica cu aworaki nan ta treciendo hopi innovacionnan den enseñansa y semper el a wak cu e mucha mester por desaroya a base di loke cu e ta gusta, cu e tin gana di bay scol y e tin gana di siña a base di su curiosidad. Eltienne ta encarga cu “Wereld Orientatie” cu ta un enseñansa innovativo y e ta conta tambe cu nan ta preparando pa e aña aki cuminsa cu un Leerorkest. “Nos a haya tur nos violin, tur nos cellonan, nos a haya nos drums y e aña aki ta bay ta hopi leuk musicalmente”, el a expresa.

Por ultimo, Eltienne ta manda su mensahe inspirador pa henter comunidad di Aruba: “Mi mensahe pa comunidad ta pa tuma curashi pa haci bo soñonan bira realidad. Tuma curashi pa por alcansa e ambicionnan, pensamento, bo logronan cu bo kier logra. Djis tuma e prome stap y poco poco, stap pa stap bo por yega na loke bo ta gusta. Mi gran deseo ta pa pueblo di Aruba por alcansa tur e soñonan cu nan ta pone nan dilanti y pa nan tin un di e miho añanan cu nan por experiencia”.