(AP) – Biyonario Elon Musk a bisa diaranson cu e ta anticipa por haya un CEO pa Twitter “probablemente pa fin di e aña aki.” Papiando via videoyamada cu World Government Summit na Dubai, Musk a bisa sigurando cu e plataforma su funcion ta permanece lo mas importante pa su persona.
“Mi ta kere cu mi mester stabilisa e organisacion y sigura cu e ta den un sitio cu ta financieramente saludabel,” Musk a bisa ora cu a puntra su persona ken e lo nombra CEO. “Mi ta pensando cu mas pa fin di aña lo mi haya un otro persona pa lidera e compania.”
Te ainda no ta cla con serio Musk lo tuma e tempo aki. Su comentario a bini solamente oranan despues cu el a publica imagennan di su cacho riba Twitter como e compania su “CEO nobo.” “Hopi mas miho cu eotro,” Musk a skirbi cu e publicacion. Despues di a haci e publicacion, un criptomoneda conoci como Dogecoin cual ta basa riba e imagen di un Shiba Inu, a aumenta den balor cu 5 porciento. Anteriormente Musk a sugeri cu Twitter mester por acepta Dogecoin den transaccionnan.
Musk, ken tin 51 aña di edad, a crea su fortuna inicialmente cu e sitio web di finanzas Paypal, despues el a crea e compania SpaceX y a inverti den e compania di vehiculo electrico Tesla. Den lunanan recien, sinembargo, mas atencion a ser enfoca riba e caos rond di e compra di 44 biyon di Twitter. Mientrastanto, e ehercito di Ucrania su uso di Musk su servicio di internet via satelite mientras e ta defende su mes contra Rusia su invasion andando di e pais ta pone Musk den centro di e guera.
Musk a ofrece un dialogo di 35 minuut cu ta trata e biyonario su miedonan tocante inteligencia artificial, e colapso di civilisacion y e posibilidad di aliennan den espacio. Sinembargo preguntanan tocante Twitter a keda bolbe back mientras cu Musk a describi ambos Tesla y spaceX como companianan cu por funciona sin cu e ta involucra di manera directo y diario.
“Twitter te ainda ta practicamente den un periodo di reverse,” el a bisa. “Tin trabao cu ta rekeri pa hiba Twitter un posicion stabil y pa crea un bon motor pa e ingenieria di programacion.” Tambe el a busca manera di por ilustra e adkisicion di e plataforma como un coreccion cultural. Desde cu el a tuma e mando di e compania, el a restaura e Donald trump su acceso na e plataforma. Musk tambe a bolbe activa e cuenta di varios persona cu a plama mal informacion durante e pandemia di coronavirus.
“Mi ta kere e idea general ta pa refleha e balornan na luga di impone e balornan di esencialmente san Francisco y Berkeley, cual ta practicamente un ideologia unico compara cu e resto di e mundo,” Musk a declara. “Y bo sa, Twitter tabata haciendo un esfuerso un tiki demasiado grandi pa impone esaki riba tur hende.”
