(AP)—Elon Musk porfin a cuminsa papia tocante e compania di inteligencia artificial (IA) cu el a lanta pa competi cu creado di ChatGPT, OpenAI.
E compania “startup”, xAI, a lansa formalmente diaranson y su meta ta pa “comprende e naturalesa berdadero di e universo.” Fuera di e declaracion aki, no a elabora mas riba dje. Lidera pa Musk, e CEO biyonario di Tesla y SpaceX cu tambe ta doño di Twitter awo, e compania ubica den e Bay Area di San Francisco a contrata un grupo di top investigadonan di IA cu a traha pa OpenAI, Google, Microsoft y Tesla. E compania no lo cay bao di e compania mayor di Twitter, esta X Corp., pero ta bay traha cu e compania ey si, tambe como Tesla, “pa haci progresa den nos mision,” segun e declaracion.
Musk tabata e co-fundado y financiado di Open AI cu a separa for di e laboratorio di investigacion varios aña pasa. E CEO di Tesla a cuminsa bira mas critico di OpenAI mientras cu esaki a recauda prominencia global y exito comercial cu e revelacion di ChatGPT aña pasa y a solidifica su conexion financiero cu Microsoft.
E revelacion publico di xAI ta sigui e comentario haci pa Musk tocante esaki na april na e ex-presentado di Fox News, Tucker Carlson. Musk a contra Carlson cu e “chatbox” popular di OpenAI tin un preferencia liberal y cu el a plania un alternativa cu lo ta un “IA cu ta busca e berdad pa purba compronde e naturalesa di e universo.”
E compania e refleha Musk su preocupacionnan tocante e futuro den cual sistemanan IA por presenta como un riesgo existencial pa humanidad. E idea, Musk a conta Carlson, ta cu un IA cu kier compronde humanidad tin menos chens pa destrui esaki.
Musk tabata un di e lidernan di tecnologia cu na comienso di aña a yama pa desaroyadonan di IA tuma un pausa di seis luna prome cu construi sistemanan mas poderoso cu e modelo mas recien di OpenAI, esta GPT-4. Den e mesun momento, e ya caba a cuminsa traha riba su mes un compania, segun historia di empresa na Nevada.
