(AP) – Miles di persona cu ta haci uso di Twitter a expresa keho tocante problema pa tin acceso na Twitter riba diasabra despues cu Elon Musk a limita mayoria usuario na 600 tweet pa dia, restriccionnan cu el a describi como un manera pa preveni cu data potencialmente valido lo ser tuma for di e plataforma sin autorisacion.

E implementacion a cuminsa mira efectonan diasabra trempan, causando cu mas di 7,500 persona a reporta problemanan usando e red social, basa riba kehonan registra riba Down Detector, un website cu ta monitor blackout online. Aunke esaki ta un cantidad relativamente chikito pa e mas di 200 miyon usuario di twitter mundialmente, e problema aki tabata suficientemente amplio pa causa cu e hashtag “#TwitterDown a cuminsa resona mundialmente.

E fayo den servicio a bini un dia despues cu Twitter a cuminsa rekeri pa hende tin un cuenta cu Twitter pa por mira contenido of perfilnan riba Twitter, un cambio den su practica di hopi tempo cu ta permiti cualkier persona mira e contenido riba e plataforma cu Musk a yega di yama “e centro di digital di mundo” desde cu el a cumpra esaki pa 44 biyon dollar aña pasa.

Den un publicacion diabierna, Musk a describi e restriccionnan aki como un medida temporario cu a tuma pa motibo cu “tabata horta data asina hopi cu e tabata bahando e calidad di servicio pa usuarionan normal.” Musk a elabora riba e medidanan den un publicacion diasabra cu a anuncia cu cuentanan cu no ta verifica lo temporariamente keda limita na lesa 600 publicacion pa dia mientras e cuentanan verifica lo por mira 6,000 publicacion pa dia.

E restriccionnan aki lo causa cu e usuarionan no lo por mira tweet nobo pa e dia despues di pasa door di 600 of e miles di tweet, dependiendo riba nan cuenta. E cantidad mas halto di tweet cu ta permiti un cuenta mira ta parti di e suscripcion di 8 dollar pa luna cu Musk a implementa anteriormente e aña aki den un intento pa aumenta Twitter su ganashi cu a disminui rapidamente desde cu el a cumpra e compania y a retira casi un ¾ di su forsa laboral pa corta costo y purba evita bancarota.

Companianan desde e tempo aki a baha nan inversion den Twitter, parcialmente a causa di cambionan cu a permiti contenido hopi mas odioso cu ta ofende un parti mas amplio di e servicio su audiencia cuminsa circula. Recientemente Musk a contrata ehecutivo di NBC Universal Linda Yaccarino pa bira Twitter su CEO como parti di su intento pa bolbe gana confiansa di companianan