![Neuralink Human Implant](https://www.bondia.com/wp-content/uploads/2024/01/Elon-Musk-ta-bisa-cu-e-prome-humano-a-ricibi-implantacion-for-di-Neuralink-pero-otro-detaye-ta-insuficiente-696x464.jpg)
(AP)—Segun Elon Musk, e prome humano a ricibi un implantacion for di su compania Neuralink durante e weekend cu a pasa. Den un publicacion dialuna riba X, Musk a bisa cu e pashent a ricibi e implantacion e dia anterior y cu e tabata “recuperando bon.” El a agrega cu “resultadonan inicial ta mustra deteccion di un ‘neuron spike’ positivo.”
E biyonario, ken ta co-fundado di Neuralink, no a provee mas detaye tocante e pashent. Ora Neuralink a anuncia na september cu e lo cuminsa recluta hende, e compania a bisa cu e tabata buscando pa individualnan cu cuadriplehia debi na herida na medula espinal of “amyotrophic lateral sclerosis”, conoci como ALS of Lou Gehrig’s Disease.
Neuralink ta un di e gruponan trahando riba conectando e sistema di nervio na computer, esfuersonan diseña pa yuda trata desordennan celebral, recupera di heridanan celebral y otro aplicacion. Tin mas cu 40 prueba di e “brain computer interface”, segun clinicaltrials.gov.
Neuralink a anuncia previamente cu e U.S. Food and Drug Administration (FDA) a aproba su “exempcion di aparato investigatorio,” cual en general ta permiti un sponsor di cuminsa un estudio clinico “den pashentnan cu ta cumpli cu e criteria di inclusion,” manera e FDA a bisa diamars. E agencia a subraya cu e no por confirma of publica informacion tocante un estudio.
E aparato di Neuralink ta aproximadamente e tamaño di un moneda grandi y a ser diseña pa ser implanta den e craneo, cu wayanan bayendo directamente den e celebro. Den su anuncio di september, Neuralink a bisa cu wayanan lo ser poni den un region di e celebro cu ta controla intencion di movemento. E meta inicial di e brain computer interface ta pa duna hende e habilidad pa controla un computer of keyboard uzando nan pensamento.
Den un otro publicacion dialuna riba X, Musk a bisa cu e prome producto di Neuralink ta yama “Telepathy”—cual, el a bisa, lo permiti usuarionan controla nan telefon of computer “por medio di pensamento so.” El a agrega cu usuarionan inicial lo ta esnan cu a perde uzo di nan ledematen.
No ta claro con bon e aparato of interfacenan similar lo traha ultimamente, of con safe nan por ta. Pruebanan clinico ta diseña pa colecta data riba seguridad y efectividad. Laura Cabrera, ken ta investigacion ciencia celebral na Pennysylvania State University, a bisa cu a pesar cu Neuralink ta uza un procedura innovativo—operacion robotico—pa pone e aparato den e celebro, ningun hende a yega di implanta esaki den hende y no tin hopi conocemento tocante esaki ainda.
Operacion celebral “no ta algo trivial,” el a bisa, subrayando e posibel riesgonan significante manera hemoragia celebral of convulsion. “Pues mi ta pensa cu nos mester ta consciente cu a pesar cu nan ta uzando un metodo innovativo pa implanta e aparato, nos no sa si esaki ta bay ta…un metodo safe pa pashentnan humano.”
El a enfatisa cu e competidonan di Neuralink ta plania di uza nan aparato pa aplicacionnan medico so, pero Musk a expresa explicitamente pa bay mas leu cu medicina. Por ehempel, Musk a papia tocante implantacion pa tur hende cu lo permiti hende pa graba tur cos y haya acceso na informacion ora nan kier—cual ta causa preocupacion pa algun hende.