(AP) – Elon Musk a bende accionnan den Tesla na balor di casi $7 biyon, mientras e biyonario ta prepara su finanzas prome cu su bataya den corte cu Twitter.
Musk a revela den un serie di documentonan regulatorio cu el a deshaci di alrededor di 8 miyon accion di su compania Tesla Inc. den dianan recien. “Den e evento (ban spera poco probable) cu Twitter forsa e acuerdo aki pa cera y algun partner di capital no cumpli, ta importante pa evita un benta di emergencia di accionnan di Tesla”, Musk a tweet riba diamars.
Musk ta ampliamente e accionista individual di mas grandi tanto den Tesla como Twitter.
Accionnan di Tesla a aumenta 4% pa cera diaranson na $883.07. Accionnan di Twitter Inc. a aumenta 3.7$ pa cera na $44.43, y a mira un aumento di 36% desde dia 11 di juli, cu mayoria pensando cu Musk ta enfrentando probabilidadnan dificil pa haya exito den corte.
Musk a contrademanda Twitter siman pasa, acusando e compania di fraude pa motibo di cancelacion di su adkisicion pa $44 biyon. El a alega cu Twitter a sconde informacion critico y a gaña su team tocante e tamaño di su base di usuario.
Musk ta alega cu Twitter a comete fraude, violacion di contract y violacion di un ley di seguridad na Texas, unda Musk ta biba.
Musk a ofrece di cumpra Twitter e aña aki, despues a purba di hala atras bisando cu e plataforma tabata infesta cu cantidadnan enorme di ‘spam bots’ y cuentanan falso, mas cu loke Twitter a revela.
Musk a bisa den spring cu e no tabatin plan pa bende hopi di su accionnan den Tesla despues di prepara finanzas pa adkiri Twitter, pero Dan Ives, un analista di industria cu Wedbush, a bisa diaranson cu ‘e situacion a cambia dramaticamente’.
Wedbush a aumenta su prijs pa accion di Twitter, “cu e chens pa un deal di Twitter awo mas probable den nos opinion, y e Street ta mirando door di e movida di poker aki di Musk”, Ives a skirbi na su clientenan.
