Elon Musk a sali ileso despues di acusacion di difamacion di un explorado di cueba Britanico, kende a bisa cu el a wordo acusa di ta un pedofiel despues cu e CEO di Tesla a yam’e ‘pedo guy’ den un tweet rabia.
Vernon Unsworth, kende a participa den rescate di 12 mucha homber y nan coach di futbol trapa pa simannan largo den un cueba na Thailand aña pasa, a busca $190 miyon den daño pa e berguensa y humiyacion causa pa e homber kende su abogado a yama un ‘bully biyonario’.
A tuma menos di un ora pa un hurado di ocho persona den corte federal na Los Angeles rechasa e peticion di Unsworth despues di un huicio di cuatro dia.
Musk a bisa cu e veredicto a restaura su fe den humanidad, mientras rapidamente el a bandona e corte cu su team di siguridad.
Musk – kende a elimina e tweet y despues a disculpa p’e – a bisa cu e expresion tabata nada mas cu un insulto nificando ‘homber bieu straño’, no pedofiel. Unsworth a provoca e atake door di haci di menos e contribucion di Musk na e rescate – un submarino miniatura cu su ingenieronan a construi pero nunca a ser uza – como inefectivo y nada mas cu un ‘PR stunt’. El a gana e odio di e genio di tecnologia sugeriendo pa Musk hinca e submarino ‘unda ta haci dolor’.
Diabierna, tabata Unsworth kende a sinti e dolor. “Mi ta acepta e veredicto di e hurado”, el a bisa.
Joshua Jones di e hurado a bisa cu e panel a dicidi cu abogadonan di Unsworth no a logra prueba nan caso. Nan a bisa cu nan a pasa demasiado tempo purbando di apela riba emocion di e hurado y no concentrando riba evidencia. “E fayo aki probablemente a pasa pasobra nan no a enfoca riba e tweet”, Jones a bisa.
Mientras cu Musk no mester haci ningun pago, e huicio tabata e incidente mas recien den cual el a enfrenta problemanan legal pa tweetnan problematico.
