Gueriya di Ehercito di Liberacion Nacional di Colombia a laga tur dos periodista di Hulanda liber, cu tabata secuestra pa gueriya desde diasabra ultimo na region di Catatumbo, noreste di Colombia, e grupo gueriyero a informa.
“Nos ta informa cu dos stranhero cu a wordo captura pa ELN na Catatumbo, a keda den libertad den perfecto condicion”, e organisacion gueriyero a skirbi riba Twitter. E grupo no a duna mas detaye di e lugar di liberacion. E periodista Derk Johannes Bolt di 52 aña y su camarografo, Eugenio Ernest Marie Follender, di 68 aña a wordo secuestra na poblacion di Filogringo, den localidad di El Tarra, departamento di Norte de Santander.
Te momento di skirbi e noticia aki, ningun autoridad a confirma e liberacion di tur dos Hulandes, aunke medio local di Cucuta – Colombia a bisa cu e liberacion ta un realidad.
El Tarra ta parti di region di Catatumbo, un di lugar preferi di ELN, un grupo cu ta den negociacion di paz cu gobierno di Colombia na Quito – Ecuador, desde luna di februari cu a pasa. Segun RCN, canal di television di Colombia, tur dos periodista a wordo hiba pa comando di polis na Cucuta, capital di departamento di Norte di Santander. E version aki no ta confirma ainda pa autoridad oficial.
