Tira klapchi y cende vuurwerk ta un forma popular pa celebra den e dianan aki na cas y durante eventonan special, pero ta importante pa un y tur haci esaki den un forma responsabel y sigur.
Mediante un comunicado di prensa, ELMAR ta conseha pa nunca cende vuurwerk of tira klapchi cerca di wairanan di tension halto.
Wairanan di coriente ta transforma y distribui electricidad di voltahe halto cu por ta peligroso si yega den contacto cu esaki. Si un klapchi cay riba un waya di coriente, e por ocasiona un descarga electrico cu por causa lesion grave y hasta morto. Ademas, klapchi por daña e wairanan di coriente y provoca un storing ora cu mas mester di coriente.
Pa garantisa siguridad di tur hende, ELMAR ta sigura cu ta importante pa sigui tur instruccion di siguridad ora cu tira klapchi y cende vuurwerk. Esaki ta inclui lesa y sigui tur instruccion riba e pakete di klapchi, y mantene un distancia leu y sigur di wairanan di tension halto.
Ademas, e ta importante pa sigui tur ley y reglanan riba uzo di vuurwerk y klapchi. Por tin area cu tin reglanan mas estricto cu ta indica cu esaki ta totalmente prohibi.
Si tuma e precaucionnan necesario, nos por sigura cu nos celebracionnan di Aña Nobo lo por ta sigur y agradabel pa tur hende.
