Compania Odinsa cu ta traha riba e Green Corridor a bolbe kap un kabel principal, causando un disturbio grandi na Oranjestad, Tarabana, Dakota, San Barbola, Wayaca y Primavera.
Esaki Elmar ta informa den un relato. Tabata algo pasa di 10:30am ayer cu yamadanan a cuminsa drenta cu coriente a bay den varios area. Un rato despues e compania di contratista Odinsa a informa Elmar cu pa kibocacion nan a bolbe kap un kabel principal di 60KV riba Green Corridor na altura di Young Fellow Bar & Restaurant.
Na e sitio e empleadonan di Odinsa a splica tecniconan di Elmar cu nan tabata cobando cu un bachue, ora cu nan a mira un kabel chikito di coriente. Nan a pensa cu ta esey so lo tabatin y a sigui coba te cu nan a nota awa. Asina a ripara cu esey no tabata awa, sino azeta blanco cu ta sali di e kabelnan principal di coriente di 60KV, cu entretanto nan a kap.
No ta prome biaha
Esaki no ta prome biaha cu ta kap kabelnan di Elmar cu consecuencia cu ta afecta suministro di coriente na consumidornan, e compania ta expresa. “Ya diabierna 2 di juni ultimo e mesun compania a kap e mesun tipo di kabel. Mester bisa cu e kabelnan aki ta masha costoso y e ultimo biaha tabatin un tecnico specialisa di Hulanda na Aruba pa un otro trabou, cu a duna un man mesora pa drecha e kabel. Luna pasa caba Elmar a corda e compania di construccion cu algun tempo atras un otro compania a kap un kabel asina y e cobransa a core den casi 1 miyon florin!”
