Ayera riba su rednan social, compania di electricidad di Aruba, ELMAR a haci un apelacion na su clientenan “pa coopera y reduci consumo di coriente rapidamente awe nochi.”
E compania a suplica: “Laga nos tur hunto coopera pa nos por mantene e suministro di coriente pa un y tur.”
A splica cu NV ELMAR a ricibi un informe for di WEB Aruba NV cu “actualmente tin un reserva minimo di produccion di coriente (megawatt) disponible compara cu e demanda di coriente cu nos pais ta rekeri,” y cu si e demanda di coriente surpasa e limite, “ELMAR lo mester inicia e proceso di load shedding.”
ELMAR a splica cu load shedding “ta nifica cu cierto area lo por experiencia un interupcion di coriente temporal y planea. E tecniconan di ELMAR ta riba stand by.”
Mientras cu mayoria di usuario di rednan social a reacciona bisando cu prome cos cu mester haci ta kita coriente for di hotel, otronan a cuestiona e decision di ELMAR. “Elmar a manda 130.000 charge nan telefon, iPad y laptop pa si coriente bay. Door cu tur hende ta bay charge nan phone hunto, causa cu coriente ta bay bin back,” un usuario a comenta. “Ban serio si cu e calor aki ta ki cooperacion nos mester tin? Aboso mester zorg pa coriente keda steady den e dianan di calor [pasobra na final di dia] nos ta paga cu coriente bay of no anto volle pond!!!!” otro usuario a agrega.
Te ciere di redaccion, no por a confirma si tabatin un blackout den anochi of si e consumo a keda abao. Por spera mas informacion den nos siguiente edicion.
