Interupcion di coriente ta un problematica cu ultimamente ta birando mas fastioso pa comunidad y tambe pa trahadonan di ELMAR N.V caminda ayera atardi un ekipo conforma pa director, operations manager y manager di customer service a bin dilanti pa splica kico ta e situacion di ELMAR na e momentonan aki.

Ayera Anthony Irausquin, ken ta fungi como director di ELMAR N.V conhuntamente cu Albertico Koolman operations manager y Rachel Kraaijvanger customer service manager a tene un conferencia di prensa debi na cantidad di storing of interupcion di coriente cu ta bin tumando luga den ultimo luna na Aruba y na unda Irausquin a enfatisa cu esaki “no ta standard di ELMAR y no ta aceptabel.”

Den ultimo dianan ELMAR NV ta confrontando varios problema di coriente, pa via di esey Irausquin a informa cu nan a registra 15 storing for di 26 di april ultimo incluyendo esun di WEB cu a sucede dia 3 di mei, el a categorisa e varios storing aki na unda tabatin dos caso causa door di fli, 3 caso causa door di blaas di helium, dos caso unda a dal un palo di luz y un cu a kima, dos caso di cable storing, cinco caso di stalige onderhoud y esun di WEB.

E situacion na ELMAR na e momentonan aki segun Irausquin a splica, ta cu na 2021 nan a haya un retraso den e parti di mantencion unda den pasado e maneho tabata diferente, e tempo ey e maneho tabata pa enfoca mas riba expansion di grid y pa traha mas trafohuis, tur esey a trece consecuencianan aworaki door cu e maneho no tabata enfoca den mantencion di infrastructura.

“Si bo wak e crecemento acelera cu nos ta presenciando na e momentonan aki, e demanda di energia ta sumamente grandi y esaki no a ser premira den pasado,” el a sigura.

Pa e motibo aki nan a bin cu un plan di mantencion, despues cu Irausquin a ser nombra como director na 2021 manera el a bisa, hunto cu Utilities Aruba N.V bao maneho di Richard Eman y ekipo tecnico, nan a traha un strategia nobo y pone como prioridad e mantencion di e grid.

Na aña 2021 nan a introduci un plan di cinco aña pa asina nan por ehecuta esaki debidamente, Irausquin a afirma cu e tabata un temporada hopi dificil net despues di pandemia unda e cadena di suministro tabata un problema hopi grandi pa ELMAR cu e material tabata tarda masha hopi mes pa yega Aruba, un ehemplo di esaki ta trafohuis cu ta tarda dos aña pa nan por ricibie na ELMAR.

Nan ta den proceso pa un mantencion hopi grandi y acelera unda en bes di cinco aña nan kier haciele den tres aña “naturalmente esaki ta trece hopi retonan cune, pasobra material ta keda un reto pa nan por ricibi esey na tempo,” Irausquin a declara.

Pa e aña aki nan ta bay construi 7 trafostation nobo cu segun lo ta bay keda cla prome cu final di e aña aki, cu e diseño nobo aki nan por instala ekiponan moderno cu lo mester resulta den un suministro di coriente hopi mas confiabel.

Albertico Koolman a splica por medio di un presentacion con e grid tabata na aña 1960, e cual tabata hopi simpel y facil pa mantene, cu e transcurso di e añanan e grid aki a expande y crece unda na 2023 a crece hopi mas loke ta trece su retonan cune.

Pa loke ta trata cifranan, pa 2013 te cu aworaki casi 100 kilometer a bin acerca unda nan clientenan tambe a aumenta drasticamente cu casi 50.000 cliente, sinembargo, cifra di empleadonan mes no a crece hopi, loke ta nifica cu casi e mesun empleadonan nan ta maneha un grid hopi mas grandi di lo cual tabata ta y nan ta haci mantencion cu ayudo di contratista.

E parti cu nan ta considera mas vulnerabel ta e parti aereo, Aruba ta un isla unda awa no ta yobe hopi esey kiermen cu tur e liñanan cu tin salpeter cu tur e sushedad of blaas di helium, por ehemplo cu tin aluminium, ta pega den e liñanan aki y tambe ta ocasiona storing.

Continuando riba e blaas di helium, ta algo cu nan no por evita pa motibo cu e liñanan cu koper ta “sunu” y manera algo ta mishi cune por ocasiona un incidente.

Koolman a indica cu ora ta usa un blaas di e tipo aki e personanan por saca su gas afo, por warde of tire den un bari di sushi pa e no bula, “nos mester conscientisa si con por haci uso di dje.”

Nan tin suficiente demanda y ora esey ta sigui crece nan ta haci nan parti di expansion pero e parti di mantencion no por keda atras y awor cu hotelnan ta biniendo, por ehemplo esun di Sero Colorado, Koolman a bisa cu e grid ta cla caba pero den e parti di mantencion ta e parti cu nan mester enfoca mas.