Diamars ultimo director di Elmar, Robert Henriquez a declara na Bon Dia Aruba, cu ta bon cla cu e compania tin un contracto colectivo (CAO) vigente y nan tin cu respet’e. E ta kere cu nan tin cu yega na acuerdonan, pero prome cu nan ta yega na dje, ta esencial pa nan conoce kico e realidad di e compania Elmar ta.

Pa tal motibo cu intermediacion di mediador di gobierno, nan a haci un presentacion na e directiva di STA y nan representantenan sindical. “Nan ta nobo y nan no ta conoce e compania den detaye”, el a bisa.

Sr. Henriquez ta considera importante pa trece dilanti e tipo di informacion aki cerca STA,
muy specialmente riba e parti cu sindicato STA a yega di trece hopi den prensa tocante kitamento di trahadonan. Director di Elmar a bisa cu esaki ta ‘absolutamente eroneo’.
El a declara cu e aspecto aki ta bon delinea den nan social protocol cu gerencia di e compania a ofrece na STA pa nan por lese y studie bon. Asina tambe nan por compronde e intencion di Elmar, kico e ta. Pa medio di e informacion aki e hendenan por saca nan conclusion a base di e documento aki. Sr. Henriquez a indica cu den e documento aki ta ‘para nechi y bon cla’ cu no tin kitamento di trahadonan. Naturalmente si un hende kier bay boluntariamente, nan por yega na un acuerdo cu Elmar.

Igualmente, Sr. Henriquez a bisa cu e compania Elmar a innova hopi durante e ultimo tempo. Nan a crea hopi proceso nobo. Esaki ta nifica cu nan mester hopi apoyo di personal pa yuda den e procesonan aki. Procesonan nobo y personal Un di nan ta e sistema di pre-pay cu ta creciendo enormemente y nan mester tin sosten pe.

Otro proceso ta keurmento di panel solar cu antes no tabatin na Aruba. Tambe e sistema pa charge auto electrico ta desaroyonan nobo pa Elmar. Sr. Henriquez ta haya cu mester tin proceso nobo pero tambe hendenan pa duna sosten na e procesonan aki.
P’esey e ta haya lamentabel cu sin conoce e background di Elmar y sin conoce con nan gastonan y entradanan ta, con nan ta move con nan margen, sindicato ta papia asina di e compania. E ta un compania cu pa añanan a yega di negosha cantidad di CAO hopi bon. Segun Sr. Henriquez, Elmar ta un di e miho doño di trabou na Aruba. E ta haya cu e tipo di reunion caminda nan por a suministra informacion na STA por yuda pa nan por cuminsa compronde otro y conoce e realidad di Elmar y di kico nan ta papiando. Si STA ta papiando di Elmar, informacion oficial di Elmar mes nan tin cu haye pa asina nan mes
por saca nan conclusionnan si e direccion cu nan ta bayendo ta bon of no. “Esey mi ta kere ta hopi esencial pa asina nan compronde kico ta come y bebe di Elmar”, el a
bisa.