Elmar no kier confirma corto circuito como causa black out

Dialuna Elmar pa prome biaha a duna un declaracion riba e blackout di diabierna pasa cu a laga full Aruba sin coriente. Segun WEB e causa tabata un corto circuito den un feeder, pero awor Elmar no por confirma esaki.

E articulo completo, awe den Bon Dia Aruba:

Elmar investigando origen di fayo cu a ocasiona blackout
Director di Elmar Robert Henriquez, durante un entrevista a splica un tiki riba e situacion cu a presenta diabierna unda cu henter Aruba a perde coriente. Tin trabounan ta wordo haci algun luna caba riba caminda grandi relaciona cu Green Corridor cu a encera halamento di feeder number cuater. Diabierna e trabou a tuma luga y ora a pone feeder 4 den servicio parce cu a sosode un eror. Ainda Elmar ta buscando e eror aki pasobra e feeder aki tabata for di servicio un siman largo.

Trabounan
“Nos tabatin un blackout completo na Aruba diabierna, cual nos ta lamenta cu a sosode. Pero  ta asina cu den e cuadro di Green Corridor, ta haciendo trabounan necesario pa acomoda tur e rotondenan cu ta bin (3 rotonde), den cual uno di nan ta na crusada di Sero Teishi cu kabelnan cu ta core abou. E trabounan aki ta wordo haci ya pa algun luna y nos a concretisa 2 of 3 halamento di feeder caba na un bon manera. Finalisando un otro feeder e siman cu a pasa cual ta feeder number 4, tin un procedura cu ta encera cu hinke den servicio sin carga riba dje, pa motibo di proceduranan di acuerdo cu WEB. Pues ta feed e, for di un otro circuito bay, cual ta haci cu e no ta yega na WEB ainda pa 24 ora y despues ta bolter e anto pone carga riba dje.”

Asina Sr. Henriquez ta splica cu ta locual cu a tuma luga diabierna ultimo unda cu ta pone e feeder number cuater den servicio. Pa un of otro motibo ta sospecha cu lo tin un fout cu a tuma luga na caminda cun’e, y cual fout ta buscando ainda pa haya sa kico exactamente a sosode. Segun Sr. Henriquez, e feeder aki tabata for di servicio casi 1 siman largo, pues si algo a sosode cun’e den e siman cu a pasa ey, no sa esaki.

Trabounan di investigacion
“E unico trabou ta pa corte y pasa rond di e rotondenan proyecta anto e ora haci e conexionnan bek y pone den servicio. Esey a bin ta tuma luga caba den e ultimo simannan cu e otro 2 of 3 feeder nan. Sinembargo, lamentablemente cu e feeder aki, tin algo robes cun’e y ta investigando esaki.”  El a sigui splica cu lamentablemente diadomingo awa a yobe  hopi duro y no por a continua cu e trabounan di investigacion.

El a splica cu a verifica si den seccionnan cu tin algun cu ta bon y otro seccionnan cu ta sospecha cu tin algo malo cun’e, e transformer ta bon pues pida, pida ta purbando di saca afo kico a bay robes. Pues locual a ocasiona e problema ainda no ta determina, el a enfatisa.

El agrega bisando cu e situacion ta un tiki fastioso, algo cu e ta remarca di a bisa den pasado caba, pasobra na momento cu un feeder cay afo, ta drenta den un situacion basta critico, pues e riesgo cu henter Aruba ta bay plat innecesariamente. “Nos no tin solamente un feeder na Aruba, nos tin 7 feeder, (kitando esun number 4 cu ta for di servicio pa e trabounan necesario). Pues mi ta puntra e ora, dicon un feeder ta bay afo anto henter Aruba ta bay plat? esaki ta di cuestiona, cual ta un opinion di mi personal.” Sr. Henriquez ta haya cu e punto aki mester wordo investiga pasobra no ta prome biaha cu un feeder ta cay afo y Aruba ta keda bon, por haya cu berdad un seccion di Aruba ta keda sin coriente, pero ta localisa e fout, drecha esaki y no ta bay den blackout.

Daño
A puntra Sr. Henriquez si tin daño di kortsluiting kisas a tuma luga, pa cual el a bisa cu ta buscando ainda pa wak si ta  esaki of por ta algo otro cu a tuma luga. “Si berdad ta un corto circuito manera tur hende a indica, echo ta cu no a haya esey ainda, pues no sa con grandi e daño ta. Pa mira si e ta algo cu por wordo repara mesora of si ta algo cu mester di mas ayudo, nos no sa, el a termina bisando.”