ELMAR N.V. y Sindicato STA a firma contract colectivo pa cuatro aña

Diabierna ultimo, 7 di juli despues di un negociacion basta largo entre directiva di Sindicato di Trahadonan di Aruba (STA) y ELMAR N.V., a tuma luga e firma di un contract colectivo nobo (CAO) cu hopi beneficio tanto pa trahadonan como pa e compania mes, manera nan a declara.

Diego de Cuba, presidente di e sindicato aki, a expresa cu esaki ta un logro hopi grandi y historico debi cu nan a sinta pa dialoga esaki varios biaha, pa asina por drecha e situacion pa e compania estatal ELMAR.NV., unda e ta situacion di “win-win” tanto pa e compania como pa e trahadonan tambe, manera el a sigura.

E contract aki tin un duracion di cuatro aña cuminsando retroactivo desde 1 di januari di e aña aki te cu 31 di december di 2026.

Tin un structura salarial nobo, unda De Cuba ta kere cu si tur cos cana bon, nan por bay pa un fondo di pension mas stabiel. Aparte di esey pa loke ta trata e contract colectivo mes, e ta considera cu nan a conoce un progreso practicamente den tur tereno como dianan di vakantie, beneficionan secundario y nan ta bay bin cu algo nobo pa e trahadonan di ELMAR N.V. cu ta e fondo di spaar, cu ta algo hopi positivo.

Anthony Irausquin, director di ELMAR N.V., a señala cu esaki ta trece basta cambio den nan organisacion y persona y esey ta un parti cu nan a pone den contract pa yega na unda nan logra yega cu esaki. “Un bon CAO, nan tin hopi bon condicionnan. ELMAR N.V. tin su retonan y p’esey nos ta traha un roadmap pa nos proximo 10 aña, pa nos por yega no solamente den e parti di personal sino tambe den e parti operacional cu tambe ta exigi bastante.”

El a gradici su ekipo negociado pa nan input y dedicacion cu a pone den esaki na unda nan sa cu tin basta cambionan cu ta tumando luga na ELMAR N.V. pero Irausquin ta sigura cu ta cosnan bon. “Nos tin cu traha duro pa por logra esakinan y nos tin cu hacie bon pasobra nos un ELMAR N.V. nos ta y nos ta compronde cu otro mas miho.”

Igualmente el a declara cu nan ta bezig trahando riba otro plannan unda nan a cuminsa pone charger stations rond di Aruba y nan lo sigui cu esey durante e aña aki y e otro añanan siguiente. “Nos tin cu tene na cuenta cu nos no por yena nos infrastructura cu hopi charger pasobra mester tene na cuenta cuanto auto tin na Aruba y ademas, hendenan ta charge nan auto na nan cas, pero esey no ta kita afo cu nos tin cu sigui si gradualmente pa duna na hende y cars dealers e confiansa cu nan por haya mas auto realoca pa isla di Aruba tambe,” Irausquin a bisa.