Ayera tardi Elmar NV a publica un anuncio ariba nan pagina di Facebook oficial na unda nan ta informa clientenan den e area di Pavia, Piedra Plat, Meiveld y vecindario cu nan ta bay realisa trabou di mantencion y reparacion esencial riba e instalacion di 12mil volt den e trafohuis cu ta responsabel pa distribui coriente na e areanan aki.
Nan ta splica cu e trabou di reparacion aki ta bay ser realisa pa un experto di Hulanda cu ta actualmente na Aruba pa eherce e trabou aki. E trabao ta cuminsa awe mainta 6 di juni 2023 y lo dura pa tres dia, concluyendo atardi riba 9 di juni 2023.
Durante e periodo aki, e compania estatal ta indica, pa sigura un servicio di coriente durante e trabao, ta bay tuma luga un transferencia di carga pa un area alterno a traves di un otro stacion.
Pero nan ta remarca cu e transferencia di carga aki lo pone un esfuerso adicional riba e kabelnan di e red di distribucion alterno, posiblemente causando un efecto di corto circuito, na banda di e carga adicional door di e aumento di consumo di coriente actualmente durante temporada di calor.
“Nos ekipo di tecniconan lo monitor e situacion durante henter e periodo di mantencion pa reduci tur riesgonan posibel. Nos ta pidi disculpa pa e posibel inconveniencia den caso di un interupcion di coriente, y aprecia boso comprension y cooperacion durante e trabou di reparacion necesario aki.”
Den fin siman cu pasa diferente bario rond di Aruba a experiencia un interupcion di coriente den pa motibo di un corto circuito den e red di distribucion. Aruba actualmente ta pasando den un ‘heat wave’ (ola di calor) intenso y esaki, Elmar ta splica, a cu a causa un impacto grandi riba consumo di coriente.
“E causa di sucedido durante weekend ta e aumento rapido di consumo di coriente durante un heat wave y su impacto riba e red di distribucion, pa cu esaki ELMAR ta haciendo su maximo esfuerso sigui pa cumpli cu e demanda halto di coriente durante dianan calor. Nos ta gradici pa cu e comprension pa e sucedido durante e weekend.”
