Awe tanto gerencia di Elmar como dirigente di sindicato STA a reuni cu mediador di gobierno pa busca un salida na e impasse cu a presenta. E reunion aki ta un intento pa evita un e accion den e compania di utilidad cu lo por afecta nos comunidad cu e suspension di e suministro di coriente. Mientras cu gerencia di Elmar a menasa di entabla un caso den corte si tin accion.
Ayera den oranan di traimerdia, Anselmo Pontilius den su rol di mediador di gobierno a purba pa haya e partidonan pa mira si tin boluntad pa firma un documento cu lo por habri espacio pa trankilisa e situacion.
E ambiente laboral na Elmar a bira mas tenso despues cu sindicato STA a wordo eligi durante un referendum luna pasa, como e sindicato cu ta representa e trahadonan di e compania di utilidad aki. STA a priminti e trahadonan cu lo negosha un contracto colectivo nobo. Mientras cu e sindicato UEA (Union Electricista Arubano) cu tabata representa e mayoria di e trahadonan a yega di negosha un CAO cu gerencia di Elmar cu ta vigente pa cuater aña.
Sindicato STA a bisa cu e trahadonan ta bay den accion awe y cu lo pone Elmar plat y Aruba sin coriente, si gerencia di Elmar no ta reconoce STA como sindicato nobo di e trahadonan y asina negosha un CAO nobo. Ayera e dirigentenan di STA a reuni cu e trahadonan pa pone nan na altura di e ultimo desaroyo.
Mediador di gobierno, Anselmo Pontilius a declara na Bon Dia Aruba cu fei siman pasa nan ta den contacto cu ambos partido y awor nan ta pendiente pa mira si nan por prepara un documento di compromiso pa asina pacifica e situacion.
Den e documento aki oficina di mediador di gobierno ta recomenda con e partidonan tin cu anda cu otro, durante e vigencia di e CAO. Mester tene cuenta cu STA a gana e derecho pa representa e trahadonan cu mayoria absoluto. E por compronde di parti di Elmar cu tabatin un reunion pendiente cu STA cu mester a tuma luga dia 15 di september. Ta algo cu oficina di mediador di gobierno a recomenda na ambos partido despues di e resultado di e referendum. E reunion aki no a tuma luga ainda y cada partido di nan propio opinion pa kico e no a tuma sosode.
Esey no ta yuda nos cu nada aworaki. Logico tin e menasa di accion, el a bisa. Sr. Pontilius a laga sa cu e tarea di mediador di gobierno ta si nan por preveni e accion, nan lo trata di hacie. Pues tin e libertad pa cada partido determina loke nan ta considera bon.
Elmar
Pa medio di un comunicado, gerencia di Elmar a informa cu despues di e referendum, STA a pidi un reunion cu gerencia pa introduci nan mes, pero no a presenta. Parce cu awor nan ta disgusta y ta purba forsa un welga sin cu tin ningun sorto di problema laboral. “Gerencia di Elmar ta lamenta e forma aki di procede di e sindicato.” Segun Elmar, STA a solicita pa un reunion, a haya un reunion pa diabierna 15 di september pa 3:00pm. pero no tabata por na e ora ey y asina a opta pa keda sin presenta na e luga indica.
Nan ta haya cu STA kier presenta su mes na gerencia ta un bon comienso. Pero, cu e reunion mester tuma luga na e orario cu nan ta stipula y na e luga cu nan ta desea, no ta posibel. Elmar ta bisa cu nan ta sigui habri pa reuni cu e sindicato y pa tin un bon relacion laboral cu nan, den representacion di un grupo di e trahadonan di e compania. Pero cu menasa pa pone Elmar plat no ta e miho forma pa drenta un compania como sindicato nobo eyden.
Un paro laboral cu consecuencia pa e funcionamento di e compania of strobando suministro normal di coriente na clientenan. Sin duda segun gerencia di Elmar lo conduci na casonan legal den corte y cu consecuencia financiero tanto pa e sindicato como tambe pa e empleadonan. Elmar ta bisa cu nan ta garantisa su clientenan cu lo haci tur locual ta na nan alcance pa sigura un suministro stabiel y operacion sin interupcion di coriente na Aruba.
Nan a informa cu ta parce cu e sindicato nobo tin intencion pa habri e contract colectivo di trabou for di otro, aunke cu e ultimo CAO firma pa e sindicato UEA, ta vence te na aña 2020. “Lo posibel pa cera un bon CAO pa su trahadonan un aña pasa, cu e acuerdo cu e tin un duracion di 4 aña. Den caso cu e empleadonan a opta pa cambia di sindicato of afilia na un otro sindicato, no por cambia e acuerdo firma entre e partidonan.”
E sindicato ta mencionando como reto cu Elmar ta pensa di haci un ‘herinrichting’ y ta specula cu lo kita hende for di trabou. Esaki ta un informacion eroneo, al contrario e restructuracion y procesonan nobo den e compania lo rekeri mas trabou. Elmar tin un acuerdo firma cu ta trata e caso aki completamente, den cual ya a garantisa e trahadonan cu lo no kita ningun hende for di trabou den un forma no boluntario.
