Segun un comunicado emiti pa compania N.V. Elmar, despues di dos siman di e susedido na unda un contratista priva a kap e kabel grandi di 60KV, e kabel por wordo uza atrobe.
Tabata diahuebs dia 6 di juli ultimo pa mas o menos 10:30am cu e compania di construccion Odinsa a informa Elmar cu nan a kap un kabel di coriente na altura di Young Fellow Bar & Restaurant y cu e tabata bashando azeta. Segun e comunicado ta bisa, tecniconan di Elmar a activa mesora, a yega na e sitio, a logra tape e kabel y contene e azeta pa asina evita cu e lo a rementa. “Uzando 27 trahado entre esunnan di Elmar y di contratista priva y dos experto di kabel for di Hulanda, awe Elmar lo cuminsa uza e kabel grandi di 60KV atrobe. A kap e kabel dos siman pasa, cu consecuencia cu mester a kita coriente den varios area y parti e coriente via otro feedernan.”
E comunicado di Elmar ta sigui bisa cu e accion rapido tabata crucial pa salba e kabel grandi riba cual ta pasa 60.000 volt di coriente. E mesun diadomingo despues di e susedido, a yega dos experto di kabelnan cu ta traha bou presion di azeta for di Hulanda pa asisti Elmar den drecha e kabel.
“Den fin di siman pasa a cuminsa test e kabel atrobe y tur prueba a resulta exitoso. Awe mainta a comisiona e kabel y e lo keda 24 ora bou ‘spanning’ pa asina diabierna drenta den funcion normal atrobe. Mester menciona cu e trabou grandi aki ta costa mas o menos 400 mil florin y ta bou responsabilidad di e compania di construccion Odinsa.”
E comunicado ta finalisa bisando cu Elmar a sinta na mesa cu Odinsa pa sigura cu ta tene mas cuidao ora di cobamento riba e proyecto di Green Corridor, pa evita inconveniencia na clientenan.
