Elmar: blackout Aruba no ta nos culpa

Elmar a manda un relato awe tardi despues di investiga e blackout riba 23 di october cu a laga Aruba completamente sin coriente. WEB a declara di biaha cu e causa tabata un fayo den un ‘feeder’ di Elmar. Pero awor Elmar ta desmenti esaki: “A test feeder y no a topa ningun fayo!” Pues no ta nan culpa.

Aki bou por lesa e relato oficial di compania encarga cu suministro di coriente:

Siman pasa dia 23 di october den oranan di atardi a presenta un fayo di coriente cu a causa un “blackout” rond di henter nos isla. Esaki ta despues di dos aña cu Aruba ta confronta un fayo asina grandi cu ta paralisa suministro di coriente completamente. E ultimo biaha cu esaki a sosode tabata na januari 2013.

Mesora despues di e susedido di diabierna ultimo, a sali informacion cu e causa tabata un “Feeder” di N.V. Elmar. Na e momento ey, e prioridad tabata pa soluciona a fayo y percura pa reconecta tur usuario bek. Ora cu a keda cla, a start un investigacion interno mesora, buscando e fayo cu a causa cu henter nos isla a keda sin suministro di coriente.

Den e investigacion conduci pa N.V. Elmar, no a constata ningun problema ni tampoco daño riba e kabel. Tur midimento haci riba e kabel a sali bon. Es mas, a wanta un “spanning” di 60KV riba e kabel durante 2 dia continuo pa garantisa y sigura cu e ta want’e y cu a kabel ta bon.

Esaki a conduci cu N.V. Elmar ta yega na e conclusion cu NO tabatin ningun corto circuito den nan kabel (feeder) y su dialuna mes a hinca e kabel bek den servicio cu un carga di 28MW. Dor cu mester a check e kabel di 60KV, a opta pa para e trabounan riba e Green Corridor un rato den e fin di siman ey, pero su siguiente dialuna mes a reanuda e trabounan atrobe y tur cos por a sigui normal.

Precisamente e luna aki N.V. ELMAR ta celebra 65 aña di existencia. Nan ta conta cu 165 empleado den servicio directo di e compania. Siendo nos compania nacional di distribucion di coriente, N.V. ELMAR ta inverti alrededor di 20 miyon florin tur aña den mantencion y actualisacion di su red di coriente. Cu lansamento recientemente di nan sistema di cobransa “CIS”, ta keda demostra cu no ta dedica atencion solamente na aspectonan tecnico y di infrastructura, sino tambe na e nivel di servicio eficiente y moderno cu ta brinda clientenan diariamente.