Durante e fin di siman cu a pasa, a sosode 3 diferente accident di auto na Paradera, avenida Nelson Oduber y Santa Cruz envolviendo palonan di luz di caya of coriente, causando un peliger pa e conductor y nan alrededor.
Mediante un comunicado ELMAR a informa cu situacion aki no solamente ta causa daño na e grid di coriente di Aruba, pero tambe ta laga un area sin suministro di coriente temporalmente, cu ta causa incomodidad pa nan clientenan.
Ademas, e cantidad di casonan di conductornan cu ta “hit & run” e palonan di luz di caya of coriente ta birando mas y mas preocupante, specialmente den casonan unda ELMAR no ta haya informacion riba e daño causa na e palo di luz, debi cu e suma ta varia dependiendo di e situacion, si ta un palo di luz of un palo di coriente e cual tin componentenan di coriente den dje. Consecuencia di esaki ta cu e ta laga e area alrededor di e palo y e grid di coriente den un situacion vulnerabel.
Ta p’esey cu nan kier pone enfasis riba e importancia di seguridad den trafico, debi cu gran parti di e grid di coriente di Aruba ta riba tera, e motibo di esaki ta cu kabelnan bou tera lo aumenta e duracion pa realisa trabounan di reparacion. Ademas cu e tera di Aruba ta seco y duro cu ta trece gastonan halto pa coloca henter e grid di coriente bou tera. Den tur dos caso, e infrastructura di trafico di Aruba lo inclui palonan di luz di caya.
Pa es motibo, nan kier haci un yamada na tur conductor pa maneha cu cuidou y consciente, sigui reglanan di trafico, pa asina evita accident di auto. Tur hende riba caminda ta forma parti di comunidad y tur hende tin cu traha hunto pa mantene un ambiente di trafico sigur pa un y tur.
Tambe nan a gradici nan tecniconan cu a traha incansabel durante e fin di siman cu a pasa pa reestablece suministro di coriente despues di accident di auto riba palonan di coriente.
