Pa minister di Turismo, Sr. Otmar Oduber, no mester existi preocupacion cu awor cu visa a wordo kita, Aruba lo wordo invadi pa Colombianonan cu ta bin keda riba nos isla. El a laga sa cu e situacion di e pais Latino Americano aki ta otro actualmente compara cu antes.
Minister Oduber a declara na Bon Dia Aruba cu dia 3 di december a drenta na vigor cu e turistanan Colombiano por bin Aruba sin mester di visa. Sinembargo e por a atende di hopi hende e pregunta cu awor cu e visa a wordo kita pa e Colombianonan, si nos ta bay mira un efecto riba nos isla mescos cu loke nos ta bin mirando cu e Venezolanonan. E mandatario a bisa cu “absolutamente esaki no ta bay tuma luga”.
Diferencia y posibilidad
Minister Oduber a indica cu e situacion di Colombia ta totalmente diferente cu e situacion na Venezuela. Pa mustra e diferencia aki e mandatario a señala varios punto, entre nan: E salario minimo na Colombia ta totalmente otro cu esun di Venezuela, pues e Colombiano tin un salario minimo mas halto. Igualmente un pasashi pa Aruba fei di Colombia ta mas costoso, contrario cu si bo ta biaha fei Venezuela cu un pasashi lo por costa bo te hasta 50 pa 60 dollar, si bo ta bay riba mercado negro. Tampoco no tin mercado paralelo manera Venezuela pa loke ta trata compra y benta di divisa.
Tambe el a laga sa cu Colombia fei di punto di bista turistico a bay drasticamente dilanti. Tambe insiguridad y desempleo a baha na Colombia y nan tin un economia basta fuerte. Na e momento aki, tur e factornan menciona –segun e mandatario- ta haci cu actualmente nos sector turistico tin un gran interes riba e Colombianonan cu tin poder economico pa bin Aruba como turista. Pues den e actual situacion cu Colombia ta pasando aden, e ta bira un mercado basta interesante pa nos industria turistico.
Mercado di Colombia y Venezuela
E mandatario a lamenta cu e no por a biaha dos siman pasa pa compaña e delegacion di turismo di Aruba cu a bay Colombia pa e lansamento di Aruba sin visa. Pero e por compronde cu tabatin un interes masha grandi mes pa e producto Aruba. E ta kere cu den futuro definitivamente nos ta bay mira atrobe un fluho natural di turistanan Colombiano cu ta bay contribui cu e desaroyo turistico di Aruba, manera tabata e caso prome cu e visa a wordo introduci 15 aña pasa.
E mandatario no kier papia ainda si e mercado di Colombia lo por reemplasa esun di Venezuela. E ta bisa cu e mercado Venezolano ta keda uno hopi importante. El a yega di declara cu tin hopi Venezolano cu tin e poder economico ainda pa biaha y bin Aruba.
