Eliminacion di klem na centro di ciudad atrobe ta den boca di pueblo. Esaki despues cu manera ta conoci, prome minister Mike Eman – despues di accion di comerciante y ciudadanonan diamars mainta den parlamento – a anuncia cu lo elimina esakinan por completo. Empleadonan di Aruparking a hera bay manifesta keriendo cu nan ta perhudica. Director di Arubus ta informa nos cu gobierno ta trahando riba un otro forma pa sanciona cu no ta e klem.

Mientrastanto awor tin un situacion tambe cu no mester paga den Caya Betico Croes. Esaki prome minister tambe a priminti pa wak si e Caya lo bay yena awor cu no ta cobra parkeer, esaki un empleado di Aruparking ta informa. Pero e situacion aki ta pa un periodo di tres siman. Pues e ley di parkeer ta keda valido, segun e empleado. Esaki ta conta pa parkeer den e vaknan blanco. Esunnan cu ta parkeer fout, den vak geel of riba acera, ainda por haya nan mes cu un sancion, manera touwmento, asina e empleado ta bisa.

Despues cu gobierno a tuma decision di elimina e klem, esaki no ta nifica cu a elimina sancion segun Teo Croes director di Arubus, encarga cu Aruparking.  “Gobierno aworaki ta trahando riba un otro forma pa sanciona cu no ta e klemnan mirando cu tin keho riba esakinan. E efecto cu esaki tin ta cu entrada di Aruparking lo baha temporalmente te ora esaki keda cla.”

Ley nobo na caminda
Bon Dia Aruba a puntra sr. Croes si entrada lo ta bahando con esaki lo afecta empleadonan. Segun sr. Croes, e garantia cu gobierno a duna ta cu na momento entrada di Aruparking cuminsa baha y cu nan en berdad no por cumpli cu nan obligacionnan, gobierno lo pone e parti ey aden. “Tur cos ta depende con lihe e ley nobo ta bay keda cla cu e otro forma di multa. Locual mi ta compronde gobierno kier evita ta di castiga e pueblo y castiga e usuario.”

Empleadonan a casi bay protesta
Empleadonan di Aruparking inicialmente tabata kier a bay manifesta na Bestuurskantoor anto nan a wordo informa cu nan no por bay den oranan di trabao segun sr. Croes. “Nan a keda den contacto cu nan sindicato pa nan por haci esey. Mi no a haya mas informacion riba esey te ainda. Pero nos a papia cu nan, nos a splica nan locual gobierno a splica nos y mi ta kere nan ta basta calma te ainda.”

E ta sigui splica nos cu e motibo pakico nan kier a bay manifesta ta pasobra nan ta sinti hopi insigur di nan trabao. Entre otro dudanan cu tin chens cu Aruparking lo cera pero di parti di gobierno ta cla cu nan no ta bay cera segun e director.

Motibo pa klem
No tabata deseo di gobierno pa duna autorisacion na empleadonan di Aruparking pa parti boet pues a bin cu e klem como un solucion pa esaki. Segun sr. Croes, e segundo motibo pakico e decision aki a wordo tuma pa bin cu klem tabata ta pasobra cu e klem nan ta haya e placa direct. Pa duna un boet y cobra un persona na su cas, cu e entrada no lo sostene e operacion, e director ta splica.

“E sentimentonan di e comerciantenan ta cu e klem ta e problema. Pero ami ta di opinion, y ta keda cu e opinion cu mi ta mira gran parti di pueblo ta comparti, cu parking tin derecho di existencia. Pasobra un agente di polis por ehempel cu a traha hopi den Caya ta bisa cu nunca el a mira ordo asina antes.”

E prome meta di Aruparking segun sr. Croes ta pa tin un sistema di parking ordena na unda cu no tin auto para unda cu ta, anto pa tin e accesibilidad pa centro di ciudad.

“Si nos mira cifranan, nos tin mas o menos un 70 pa 75 mil transaccion pa luna. Operando solamente entre 9’or cu 3’or di atardi, nos por mira cu hende ta bin den Caya.” Sr. Croes ta conclui cu e ta haya ta facil pa culpa e parking pero cu tin mas otro factor cu ta hungando un rol den pakico no tin hende ta cumprando mesun hopi den Caya Betico Croes. “Mi ta kere cu cada ken conoce nan negoshi y cada ken lo mester move pa esey. Atrobe, mi no kier trapa riba ningun hende su dede pero si mi no ta kere cu parking ta e motibo di e bentanan malo.”