Eleccion tur aña?

Eleccion tur aña? Mayoria di nos lo no kier ni pensa mes: caminda blokia tur fin di siman, truck cu sistema di zonido na cada skina… Algo manera carnaval, pero sin trahe bunita, y sin e musica. Pero, pensa tambe riba e parti positivo: caminda kibra ta keda drecha, bario sin luz ta haya luz, diripiente tin pickup straño ta aparece den bo bario y ta cuminsa corta mata, drecha acera… tur cos ta mustra miho. Ora bo pensa bon, bo ta bin dal causa cu ta pa basta aña bo no tabata mira nan. Tempo cu e gobierno aki a sinta, bo tabata mira nan tur caminda, despues a bira keto. Por ta cu ta nos ta mira e cos robes: no ta un derecho pa biba den un bario limpi y bon manteni, ta un fabor e ta. Y pa un fabor keda un fabor, cu cual nan por sorprende bo ‘positivamente’, anto e no por ta algo regular, toch?

Loke ta describi aki, no ta conta pa e bario so. Diripiente ta trahando manera salvahe riba diferente rotonde pareu, manera cu no tin mañan, Green Corridor mester keda cla, ta bay traha riba e ruina di ex JFK … Lastima cu e edificio bieu di DOW ta mustra mes tristo ainda, Bushiri ta manera cu gobierno anterior a bay lag’e, pero tin bastante cos cumpli, asina ta, mester wak e banda positivo tambe…

Naturalmente tur esaki ta un poco exagera. Cu eleccion tur aña nos lo tin problema grandi. Parlamento lo caba di bira un caos si e no ta caba, cu un composicion diferente cada biaha. E punto cu kier enfatisa aki ta, si no ta posibel mustra mas diligencia durante e cuatro aña cu ta goberna. Manera nos ministro encarga cu husticia cu despues di casi ocho aña ta sorprende tur hende cu e noticia cu e tin un ‘plan’. No cu nos a haya esey pa mira, pero nos ta kere riba su palabra.

Igualmente diripiente e ministro encarga cu asunto di medio ambiente ta alegra nos cu e noticia cu nan ta bay uza tur ley cu tin pa actua contra explotadonan di dump ilegal… Hopi bon, pero e problema no tabata cu practicamente no tin ley ambiental? Prome cu eleccion lo no tin ley ambiental mas tampoco, anto nos mester warda pa aki cuatro aña nos tende cu e proyecto di ley ta cla, pero ya, e ta na parlamento. Y manera boso sa, nan ta independiente…

En todo caso, kico ta loke nos kier bisa aki? Cu nos no mester keda impresiona cu tur loke ta ser haci na ultimo ora, prome cu dia di eleccion. No comprende malo, tur cos bon haci, ta bon haci. No tin motibo pa purba kita merito unda tin merito. Pero ta importante señala kico a keda sin haci. Cosnan cu a priminti y cu no a keda cumpli. Y, e cosnan cu nos mester por spera di cualkier gobierno y cu nos no a haya.  E cosnan ‘normal’ cu tur gobierno mester tin den nan plannan. E cayanan di tera, cu ta bira un desastre di lodo ora awa yobe, y un martirio di stof pa mayor parti di aña. E plan pa vivienda social, den un pais unda mayoria di hende no ta yega na un entrada suficiente pa traha nan mes cas. Ocho aña di en berdad drecha (cierto) scol, pero ocho aña perdi pa mehoracion di contenido di enseñansa. Ocho aña di propaganda ‘berde’ y di ‘desaroyo sostenibel’, y practicamente ningun avance den e terenonan cu ta conta. Por ta cu ta nos no a comprende bon, den e sentido cu ta e propaganda tabata constante y sosteni, nada mas.

Y pa colmo den henter e asunto, un aspecto unda no a tuma na cuenta e famoso lema di sostenibilidad, ta cu kico ta paga tur e cosnan aki. Den ocho aña a manda nos debe publico te 86% di GDP, cu tabata na 49% na fin di 2009. Anto ainda nos no a conta aden e placa cu a uza pa realisa tur e proyectonan aki, pasobra di presupuesto practicamente no a uza nada pa inversion. E famoso proyectonan PPP, un compromiso di casi mil miyon florin, ta wardando den banda ey pa nos bay paga. Nos debe a crece realmente cu 85% (casi redobla), mientras nos economia a crece entre 2009 pa 2016,  6,7% den GDP nominal. Den 7 aña nos a fia como 270 miyon florin pa aña di promedio, plus e debenan di proyectonan PPP.

Y e problema mas grandi di tur esaki ta cu e actitud aventurero y iresponsabel aki ta haci cu cualkier gobierno cu sigui despues, ta confronta e problema cu no tin placa pa haci e cosnan ‘normal’, te pa resta placa pa haci e cosnan ‘nice’ cu lo bin como promesa den campaña. Ora yega momento di fiesta na inauguracion di tal o cual proyecto, loke sin duda lo tuma luga cu ‘broche de oro’, ta bon nos para keto na e consecuencianan di tur esaki, cu no ta laga espacio pa wega politico.