Dia di entrega di lista pa eleccion ta tras di lomba, y banda di ‘sorpresa’ tabatin caso anticipa di hende cu a keda riba lista, ‘a pesar de todo’. E caso principal ta e ex-ministro di Infrastructura y parlamentario pa e partido grandi den oposicion, cu ta sospechoso principal den e caso hudicial Avestruz. Despues di tur e rumornan cu talvez e no ta aparece riba lista mas, awor a opta pa pon’e na ultimo puesto, como si fuera esaki ta haci e problema hudicial y moral menos grave. En todo caso e nobatonan cu a join e biaha aki, dificilmente por bisa cu nan no a nota su presencia y lo haya cuestionamento pakico nan ta join un lista cu tin persona ariba cu sigur no ta cay den premio pa loke ta integridad personal. Simplemente bisa cu ‘tur hende ta inocente te ora comproba cu nan ta culpable’ ta en realidad nonsense, pasobra esey ta implica cu nunca ningun politico no lo entrega ningun puesto tanten e no perde su caso final dilanti Hoge Raad, loke por dura tres o cuatro aña desde e momento cu investigacion penal inicia, y tur e tempo ey un persona asina por ta un estorbo pa e propio organisacion. Bisa anto cu no ta ningun problema ta implica cu esey ta e manera di pensa den e organisacion ey, y esey ta un constatacion grave.

Compara esaki cu e situacion na Corsou, unda un ministro den un asunto hopi menos grave a renuncia su puesto “pa duna autoridadnan hudicial espacio pa haci nan trabao”. Nos mester constata anto cu na Aruba nos tin un otro mentalidad, di defende ‘te na morto’ esnan cu ta parti di e hermandad di partido? Di unda e diferencia aki ta sali si nos comunidad den pasado tabatin un mentalidad parecido na esun cu ainda t’ey den politica na Corsou; nan a bira moralmente superior, y dicon?

Nos ta comprende cu e partido mas antiguo di nos sistema ta desea y lo mester renoba; e pregunta ta si esaki ta e manera mas adecua pa hacie. Mas ainda pasobra no ta trata solamente di atrae sanger nobo pa e partido; aparentemente ta posible pa haya hende join lista a pesar di e presencia di un candidato asina den problema cu husticia. E otro ‘cien pesos’ ta si esaki ta gana voto, loke ta hopi mas importante. Claro cu e base leal di semper lo vota pa e partido, y si e candidato aki ta na number dos o ultimo, esey lo no haci ningun diferencia. E diferencia ta si asina lo atrae (parti di) e votadornan cu a perde na 2017, y parti di e votonan nobo. Parcialmente e efecto negativo pa e partido tabata consecuencia di caso Ibis cu tabata concerni e ministro encarga cu Labor di e tempo ey. Awor esnan cu a bira lomba pa e partido na 2017 pa e escandalo Ibis, por constata cu nada no a cambia, cu al contrario a bin acerca e escandalo Refineria di Aruba, cu posiblemente por involucra otro ex-ministro di e gabinete di e tempo ey. Sin embargo, finalmente ta e partido mes lo mester dicidi, y a haci esaki tambe di e manera aki. Di tur forma, e daño ta haci caba, y palabra ta na e votador.

Otro fenomeno interesante den e eleccion aki ta e serie di ministro cu a bandona/keda destitui den e periodo aki. Banda di dos ministro di Infrastructura di mesun partido, pero pa motibo totalmente diferente, e ultimo dianan aki a duna como resultado e retirada definitivo di dos ministro di e actual gabinete demisionario mas. Den ambos caso ta trata di mandatario cu no a presta asina bon, segun nos opinion, y tabata compañero den e asalto riba nos recursonan marino den e asunto cu a costa un otro ministro su puesto. Finalmente a resulta cu un manyen di fanatico di spearfishing a keda complaci, unda a djis lubida interes general di Aruba y tratado internacional cu cual nos mester cumpli. Ayera en todo caso Aruba no a perde nada cu e retiro di politica di ambos.

Finalmente e asunto di tanto partido. Na promer lugar e cantidad di partido nobo ta un señal di insatisfaccion cu e manera di opera di e dos grandinan. Continua cu e actual gabinete no ta parce atractivo pa hopi hende, pero duna e partido cu den ocho aña a hinca Aruba den e abismo cu e ta aden actualmente, tampoco ta parce un alternativa. Despues cu nos mira ken den e siman venidero ta sobrevivi e busqueda di firma, ta keda e pregunta cuanto di nan riba dia di eleccion ta ‘make the grade’. E tempo ta hopi cortico pa nan perfila nan mes faborablemente, y esey ta un bentaha pa e dos grandinan, cu lo ta e candidatonan principal pa restzetel den nos sistema electoral. Sin embargo, ta keda un factor insigur, y pa bon motibo. Nos no sa ainda cuanto impacto e aspecto moral ta bay tin. Mayoria di nos ta keda apoya un manera di haci politica, y di dirigi e pais, unda famia y amigo ta prioridad, o cambio positivo ta haya un oportunidad? Nos no kier ta pesimista.