(ElNacional) Conseho Nacional Electoral (CNE) a informa ayera cu e eleccion presidencial, eleccion pa Consehonan legislativo y Conseho Municipal lo ser teni den e di dos mita di luna di mei venidero. “Cu e acuerdo aki ta ratifica cu ta scoge nos lidernan cu e garantianan constitucional y democratico mas amplio”, Tibisay Lucena, presidente di CNE, a declara den un rueda di prensa.
A suministra e informacion durante firmamento di un acuerdo di garantia electoral. Lucena a resalta cu e entidad lo percura pa cumpli cu e contenido di e documento y a invita e demas organisacionnan politico pa postula candidato presidencial. Di igual forma, a establece cu lo cumpli cu e proceso di auditorio, cu ta encera observacion internacional y e presencia di medionan di comunicacion publico y privado. Den e acuerdo, firma pa Avanzada Progresista, MAS y e gobernante Partido Socialista Uni di Venezuela (PSUV), a yega na e pacto cu e urnanan di eleccionnan pasa cu a ser hiba na otro luga, lo bay atrobe na nan lugar di origen.
Retencion di varios periodista y invasion na cas di Leopoldo Lopez Efectivonan di Servicio Bolivariano di Inteligencia Nacional (Sebin) a drenta diahuebs mainta den cas di Leopoldo Lopez, y a keda paden tambe, asina esposa di Lopez, Lilian Tintori a declara riba Twitter. E invasion ta posiblemente un represalia pa un entrevista cu Lopez a concede na The New York Times, den cual el a vocifera critica fuerte riba e regimen.
Diahuebs mainta funcionarionan di Sebina retene varios periodista den vecindario di e residencia di e preso politico Leopoldo Lopez, unda nan tabata pendiente di algun noticia. Otro miembronan di prensa ta bisa cu esunnan reteni ta Vanessa Rivas y Jhonathan Guaricuco, reportero y conductor di Caraota Digital; Carola Gonzalez y Alejandro Medina, di Univision; Rafael Hernandez, reportero di NTN24 y Luis Gonzalo Perez, periodista di Venemundo. Carola Gonzalez a splica cu e agentenan a kita nan carnet y cedula pa verifica nan datonan. Tambe nan a revisa nan ekipo. No a pasa pa aresto. E Colegio Nacional di Periodista (CNP) a emiti un declaracion denunciando e sucedido, cu nan a cualifica como un atake nobo di gobierno riba prensa. “E agresion contra periodista y e hostigamento di medionan a converti den un politica di Estado”, nan a resalta.
Fuente: BBC
