Ayera mainta a tuma luga na Kamer van Koophandel en Nijverheid (KvK), e eleccion pa representante di empresanan chikito den directiva di KvK. Sr. Martijn Balkestijn, director di KVK a splica durante un rueda di prensa con e proceso aki ta tuma luga y kico e funcion di representante di empresanan chikito lo ta pa e aña nobo.

Sr. Balkestijn a splica cu tin nuebe miembro den e Directiva di KvK cu ta existi, di empresa grandi y chikito y cada aña KvK tin eleccion di tres miembro cu sea ta di dicidi di continua of por dicidi di renuncia y na momento cu e miembronan dicidi cu nan ta continua nan por postula nan mes via un procedura stipula den e ley di eleccion di KvK.

Pa e eleccion aki di representante di empresanan chikito, tin un puesto disponibel y tres persona a postula nan mes. E tres persona cu a postula nan mes ta Sra. Jaritza Janila Correa, Sr. August Anthony Croes y Sra. Lay Hing de Kort-Yee.

Pa loke ta trata e funcion specifico den e hunta di e representante di empresa chikito, Sr. Balkestijn a splica cu e idea ta pa den conhunto cu e directiva nan lo traha ariba un plan strategico pa e añanan binidero y esey lo wordo traduci despues den un plan strategico pa e aña vigente y a base di esey, conhuntamente cu e stakeholdersnan den e sector comercial nan por organisa townhall meetings, entrevistanan pa wak kico ta e temanan cu ta relevante pa ataca.

El a indica cu por e directiva di KvK di mes t’ey pa scucha e preocupacionnan, scucha e sugerencianan cu doñonan di empresanan ta trece dilanti y e ora ey, cu e directiva nan ta traha ariba un informa ccu ta wordo dialoga cu gobierno y cu ta wordo presenta de vez en cuando.

“Ya caba nos a yega na un solucion na mesa pero de vez en cuando bo mester ta un poco mas vigente y e ora ey nos ta pone e punto di bista di sector comercial cu nos semper ta alinea cu gobierno y ya nos mester defende e sector comercial, e importancia di e sector”, el a menciona.

Balkestijn a informa cu tur hende cu ta inscribi den KvK cu ta riba e lista di votador di empresanan chikito por vota y esey ta un cantidad di mas cu 7 mil hende. E votadornan a ricibi un carchi di votacion via nan email y hunto cu nan ID, nan por a presenta entre 9or di mainta y 12or di merdia pa vota.

Pa loke ta trata e planificacion di e directiva pa aña 2022, e director di KvK a splica cu ya caba nan tin cierto puntonan cu ta den un plan cu ta wordo discuti cu gobierno caba y cierto aspectonan tin interaccion fuerte cu e landspakket. Fuera di esey, e ta indica, tin otro dificultadnan pa e sector comercial.

“Por ehempel loke nos por anticipa ta na momento cu e subsidio di salario a descontinua por ta cu cierto companianan lo cay den cierto problemanan pasobra si e ingreso ta mucho abao y bo ta depende di e subsidio y aworaki el a stop, nan lo haya problemanan, dus nos lo bay scucha e efectonan ey tambe”, el a splica.

El a agrega tambe cu e directiva nobo, cu lo cuminsa proximo aña, lo tin nan prome reunion dia 12 di januari, y e directiva ey ta determina e direccion pa e aña. Y segun el a indica esey ta depende tambe di cada candidato cu tin nan mesun ingreso, cu tin su trabao cu ta indica cu tin cierto sugerencianan, tin cierto problemanan of si KvK mester percata di cualkier situacion.

Por ultimo el a enfatisa cu cada candidato cu tin su trabao, ta defende interes di su mesun compania, pero e ta defende tambe interes di e hendenan cu a vota pe y nan lo purba di facilita esunnan cu a vota pa e candidato ey. “Di mes e interes comun na final di dia ta cu tur e candidatonan ta defende e interes di sector comercial”.