Esey ta dicidi caba…

Mañan tin eleccion presidencial na Venezuela. Al menos, loke mester pasa pa eleccion. Un proceso completamente controla pa gobierno dictatorial di Nicolas Maduro, cu ta busca un forma di legitima su permanencia den poder, di tur manera. Pa haci esey, a percura pa tur candidato eligibel no por participa, a percura pa henter oposicion practicamente no kier participa mes, cu nan rason. Y logicamente, casi sigur e resultado lo ta faborabel pa e presidente actual, ya cu esunnan cu lo bay vota, ta mayoritariamente esunnan cu ainda ta kere den su liderazgo. Aunke nan no ta e unico nan cu ta bay vota. Lo tin esunnan tambe cu ta bay cumpli cu nan deber civico, tambe pa no keda malo cu e dictador. No mester subestima, den un pais unda hamber a bira algo normal, e forsa di imposicion di un sistema di limosna a traves di e pakete di cuminda cu ta parti solamente pa e personanan cu a registra oficialmente, cu tin un ‘carnet de la patria’ pa proba cu nan ta digno di haya ayudo, pa poco cu e ta.

En todo caso, ta di anticipa cu e pais ta manece dialuna proximo cu e mesun presidente cu a logra nombra su mes pa un periodo nobo di presidencia. Esey ta implica cu nada no a cambia? Tin cos cu lo cambia, otro no. Por ehemplo, por anticipa cu pa e opositornan conoci lo cuminsa un periodo hopi mas dificil. Segun cu e situacion economico bira mas desastroso, e regimen lo cuminsa perde e ultimo tiki berguensa o respet, si nan sa kico esey ta, y persecucion di nan contrincantenan conoci por bira hopi mas severo. Esaki nos a mira den hopi situacion similar na tur parti di mundo, unda un dictadura ta uza tur forma y medida posibel pa mantene su mes den poder. Riba nos continente nos a mira esey sucede na un pais manera Surinam, tempo cu Bouterse no tabata mira otro opcion cu esun mas abominabel, esta di laga mata su contrincantenan principal, mientras nan tur tabata civil no arma. Un situacion hopi diferente compara cu un pais manera Nicaragua, unda un forsa militar superior di Frente Sandinista a yega na controla mayoria di e teritorio, te cu no a keda nada mas pa Anastacio Somoza cu busca un pais amigo pa bay biba cu tur e rikesanan horta di e pais. El a haya esey cerca su amigo dictador Alfredo Stroessner na Paraguay.

Esey por bira e futuro di Nicolas Maduro tambe, pero laga nos no specula tocante e scenario ey. Fuera di e peligro di un persecucion inclemente, tin e realidad grandi, pa tur hende den un economia cu a collapse caba, y cu ni e actual gobierno, ni oposicion lo por pone na su luga loke a destrui den produccion agricola, pecuario, y industrial. Lo ta logico cu e sancionnan Mericano, y di aliadonan Europeo y Latino Americano, lo intensiva si no tin cambio den poder. Y mirando e efecto grandi cu e embargonan reciente na diferente isla den Caribe a haci cu e capacidad di e pais pa mantene e unico lifeline cu e tin cu ta su benta di petroleo, por anticipa cu e caida definitivo di Pdvsa lo marca final di e gobierno aki. Y no pasobra tin un contrincante arma ta bati na porta, sino cu simplemente e pais, sigur cu e reciente desercion cu ta tumando luga den e cuerponan uniforma, na un dado momento no por controla e pais mas, simplemente pasobra nan no por ta tur caminda y hende desespera ta cuminsa tuma ley den nan mes man. Realmente nos lo ta experimentando algo unico aki: e pais mas devasta den ultimo siglonan, sin cu tin un conflicto arma ta tumando luga. Simplemente e ehemplo mas increibel di te unda cos por yega na man di un matrimonio fatal entre politico comunista, cu ya hopi tempo pasa a lubida e idealnan cu nan tabata bisa cu nan tabata sigui, si acaso esey por a sirbi di algo, loke no ta e caso, y un casta di militar halto cu ta comparti cu e politiconan e hamber pa placa y poder.

Y si cos yega asina leu cu e regimen aki ta pertenece na pasado, y gran parti di e Venezolanonan por bolbe nan cas, nan lo mester corda un cos bon. Esey ta cu e aventura socialista di Chavez y Maduro tabatin su pakico. Venezuela no a bira victima solamente di un grupo di socialista hambra pa poder. El a bira victima tambe di un elite economico, cu tabata kere cu solo ta sali mainta pa nan so. Hiba e manera di pensa aki atrobe na e pais pa sigui biba manera un siglo pasa, lo no funciona. Ademas, Nicolas Maduro y su banda por a hiba corupcion na un nivel nunca bisto, pero ta nan a inventa corupcion na Venezuela? Por lo tanto, crea un pais democratico lo tuma hopi mas cu simplemente regresa y eherce poder atrobe, old school. Un cos ta sigur: mayoria di Venezolano nunca mas lo kier pasa den e experiencia aki; laga nos spera cu esey lo no ta e caso tampoco.