Eleccion no ta cambia… Realidad di e pais…

Eleccion a bin te bay y a laga nos cu e perspectiva di otro gobierno pa atende nos asuntonan. Cuanto lo cambia segun deseo di e partidonan cu lo forma coalicion, esey no ta enteramente conoci ainda, pero mirando gobernacion en general y e aspectonan importante pa atende, cada vez nos ta keda confronta cu tanto cos cu no lo cambia djis pasobra tin otro gobierno; solamente tin otro cu e responsabilidad di atende e mesun asuntonan. Esaki tin tur cos di haci cu e hecho cu goberna nos pais den e proximo añanan ta mara na e supervision financiero di gobierno di Reino. Tin un nivel superior na esun di gobierno di nos pais cu ta pone e limitenan na loke cualkier gobierno por haci, pasobra e recursonan pa esey simplemente no ta existi. E campaña cu a termina mes a duna nos algun ehemplo di cosnan priminti di cual nos ta puntra nos mes ta con ta bay paga nan.

Por ehemplo: e promesa haci pa aumenta e suma mensual di AOV drasticamente. E partido democrata cristian cu a haci tal promesa, di aumento cu 50%, ta candidato importante pa ta e partner mayor den e proximo gabinete. Nos tin caba e reaccion di SVb cu un tal aumento lo caba cu fondo di reserva, apenas un tiki recupera despues di Covid, completamente den dos aña di tempo. E cifranan real? Segun e ultimo cuenta anual di SVb cu ta disponible, 2022 (unda 2023 ta keda, a proposito?), SVB a paga na 2022 Afl. 280,7 miyon na AOV/AWW. Paga 50% mas ta pone nos di un aña pa otro na gasto di alrededor di Afl. 420 miyon, cu ingreso di prima na Afl. 320 miyon. 100 miyon menos. No un perspectiva realistico, di ningun manera. Sin embargo, esey no ta e unico manera pa duna e pensionado extra ingreso. Actualmente ta funcionando caba e ‘reparatietoeslag’ cu ta fruto di e dialogo social cu e mesun partido a institui y cu gobierno den ultimo dos periodo a laga intacto, aunke e no tabata nan proyecto. Pregunta practico: cuanto e ‘reparatietoeslag’ ta costando nos actualmente? Segun e mesun cuenta anual di SVb, a paga Afl. 31,2 miyon na reparatietoeslag pa AOV y AWW. Cu e suma paga na AOV y AWW menciona di Afl 280,7 miyon, por lo tanto e reparatietoeslag ta alrededor di 11% di loke ta paga for di e fondo di AOV/AWW mes. Desde augustus 2024 a aumenta e toeslag cu Afl. 30, haciendo e suma total Afl. 200 pa luna pa cada pensionado. E suma total di e operacion aki nos no tin disponible ainda, pero en todo caso ta hiba nos na un aumento te por lo menos Afl. 36 miyon pa aña. Cifra dramatico? No, si gobierno(nan) ta desea di keda cofinancia pension di biehez for di cash flow di gobierno, probablemente nan por haya e recursonan necesario. Sin embargo, duplica e toeslag cu 100% ta significa un aumento cu en total lo costa mas o menos Afl. 75 miyon, cu mester aparece riba presupuesto 2025, entrega y no trata ainda, cu por ta suheto na cambio anto, si e gabinete nobo desea esaki. Loke en todo caso mester keda bon cla ta cu di ningun manera e suma aki por bin di e afamado ‘surplus’ cu no ta pa e tipo di operacion aki, sino solamente pa ‘inversion’. Esey ta implica cu e unico manera pa logra reserva placa dentro di presupuesto ta a base di corta den otro gasto cu a presupuesta te awor. Nos ta mira un gabinete cuminza opera a base di corta den presupuesto pa crea espacio? No, pero tin un otro ruta cu no ta recomendable: gasta e placa numa y confronta e supervision di Reino cu un ‘fait accompli’. Esey ta un opcion cu nos no ta recomenda, pero lo no ta unico pasobra e gobierno saliente a haci exactamente esey cu e aumento di salario pa e empleado publico y otro asalariado cu ta cobra via gobierno. Realmente no tabatin un reaccion fuerte di banda di gobierno Hulandes, pues purba bo suerte wak te unda por yega ta un opcion.

Tur esaki ta trece nos riba otro aspecto di e realidad di e supervision Hulandes. Esey ta e Landspakket cu despues di cuatro aña ta mustra bastante prematuro ainda, den e sentido cu hopi ainda ta den fase di preparacion. Ta parce indispensable cu den e proximo cuatro aña lo mester sucede algo concreto. Por ta cu ta p’esey e promer ministro saliente ta parce bastante relaha, a pesar di no por continua den gobierno, pa via di e perspectiva di cantidad di cos laga na mitar di caminda pa e siguiente bin topa cu nan? Nan ta hopi pero uno importante ta e reforma fiscal cu no a ni yega mitar di caminda, pero a keda pega entre otro riba e rotundo negacion di aboli e sistema di BBO na fabor di un BTW, cu lo elimina e caracter inflacionario di e BBO. Ta incomprensible cu gobierno saliente a keda insisti den mantene e factor inflacionario interno principal aki, aludiendo un bahada gradual di inflacion, algo cu en todo caso no tabata conta pa e categoria di cuminda, por ehemplo. Esaki tabata y ta causa ainda di problema financiero pa e parti grandi di e poblacion cu na fin di nan placa ta resta un pida luna ainda. E problemanan existente sin embargo no ta parce asunto cu ta resolve cu priminti tur hende mas entrada. Tin reto grandi sperando proximo gabinete.