Honduras dentro di un par di dia a converti den un caos cayehero. Durante tres dia, e candidato di e Alianza di Oposicion contra Dictadura, Salvador Nasralla, a casi yega na presidencia di Honduras, superando cu casi 40.000 voto e actual presidente di e pais y candidato pa re-eleccion pa Partido Nacional, Juan Orlando Hernández.
Pero, manera den un careda di ciclismo, den e ultimo minuut, Hernández a pica dilanti Nasralla, y ainda sin caba conta voto, cu 90,40% di urnanan conta, tabatin un bentaha di 32.284 voto.
Nasralla, conoci como El Señor de la Televisión pa e tres decada dedica na presenta programa deportivo y concurso, a comparece diaranson dilanti prensa despues di mira con poco poco su aspiracion di ta e siguiente presidente di Honduras a cuminsa desaparece.
“Nos no ta reconoce e resultado di e sistema tramposo di Tribunal Supremo Electoral”, el a manifesta, algun ora despues di firma hunto cu Orlando Hernández un documento unda nan a compromete dilanti di e Organisacion di Estadonan Americano pa respeta e resultado di e eleccion di diadomingo pasa.
Despues cu e diferencia entre e candidatonan a aumenta den su contra, Nasralla a bisa cu e pacto “no tin validez”, ya cu segun el a declara, e no lo acepta cu a introduci actanan adultera, cu no tabata firma.” E declaracionnan den cual el a afirma cu nan a haci trampa cu ne y e hecho cu e candidato di e coalicion progresista tabata perdiendo gradualmente mas tereno, a provoca cu simpatisante di e Alianza a subi caya na capital di Honduras y otro municipio den interior di e pais.
Durante varios ora tabatin enfrentamento cu militar y polis den nochi y marduga di diaranson pa diahuebs, despues cu e fanaticonan di Nasralla a lansa piedra y palo riba e soldaatnan cu tabata cuida e Instituto Nacional di Formacion Profesional, unda tabata warda e maletanan electoral y un di e centronan di computacion.
E militarnan a responde cu bom teargas contra e manifestantenan, provocando varios herido, cu mester a haya atencion den centronan medico. Asina mes, tabatin convocacion pa varios manifestacion pa diahuebs tambe, na capital Tegucigalpa y na ciudad grandi manera San Pedro Sula. Durante diabierna, ainda e conteo no a termina, cu un bentaha comodo pa presidente Hernández.
