E proceso di eleccion municipal na 153 municipio di Nicaragua a conclui ayera sin ningun problema, y cu un participacion regular di votador, segun un informe a splica.
E desaroyo pacifico di e proceso di eleccion a ser certifica pa Wilfredo Penco, hefe di mision di observador di Estadonan Americano (OEA). El a prepara 60 observador pa traha na e principal departamentonan di Nicaragua.
Penco a splica na un rueda di prensa, prome cu e proceso a termina, cu votacion tabata pacifico y civico. Den e proceso aki ciudadanonan a elegi autoridad municipal pa 153 municipio di e pais aki.
“Nos a constata un proceso normal, cu hunta di recepcion di voto debidamente integra y cu tur material necesario pa nan trabao,” Penco a splica den declaracion pa medionan di comunicacion.
Tur hunta di recepcion di voto a cuminsa cera nan porta banda di 6 or, despues cu nan a laga e ultimo votadornan drenta pa participa, cu tabata wardando pa haci uso di nan derecho di voto y pa asina por elegi autoridad municipal manera alcalde, vice-alcalde y miembro di conseho municipal.
Conseho Supremo Electoral a convoca mas di 3.8 miyon elector pa eligi 6.088 autoridad municipal den 153 municipio di 15 departamento y dos region autonomo di Caribe di Nicaragua.
