E weekend aki tin varios actividad carnavalesco na caminda. Aruba lo conoce su Reina Grandi y Sra. Carnaval, nos lo mira un Parada nobo den Sta. Cruz y ta toca turno na e muchanan pa gosa den nan Parade na Oranjestad.
Diabierna 10 di Februari lo eligi un Reina Grandi y Sra. Carnaval pa e temporada di Carnaval 63. Esaki lo tuma lugar den Aruba Entertainment Center cuminsando pa 8or di anochi. Pa ambos categoria tin 3 candidata.E reinanan ta den full swing cu nan preparacionan pa presenta lo mihor posibel pa loke ta nan speech y show. Claro tambe tin ensayo andando pa loke ta e Opening show di tur candidata hunto. Pa ambos categoria e Reinanan lo subi escenario den e secuencia aki.
Reina Grandi: 1. Siobhan Kramers, EPI (kavel #1) 2. Kimberly Julsing, TOB (kavel #3) 3. Sabina Rey, Dushi Carnival Group/Sta.Cruz (kavel # 3)
Sra. Carnaval: 1. Julie Tromp, Sra. Champagne (Kavel #3) 2. Milangela Peasch, Mrs. Dreamers Team (Kavel#1) 3. Sharilousha Ras, Mrs. San Nicolas (Kavel #2)
Portanan lo habri 7or di anochi. Carchinan ta obtenibel na CITGO Boulevard y Sta.Cruz, y tambe na oficina di SMAC. Ta conseha pa bo buscabo entrada trempan pa bo no keda afo di e anochi mahestuoso aki. Ta anuncia cu tur presente por gosa di presentacion di nos Rey di Tumba Jerrino “Bass” Ridderstap tambe. Ta manda palabranan di exito pa tur candidata pa Elecion di e di 63 Reina Grandi y e di 23 Sra. Carnaval pa Carnaval 63.
Diasabra 11 di Februari a organisa un Parada den districto di Sta. Cruz. Bou di e nomber di Lights Up Parade. Por conta cu participacion di Quality Brassband y Dushi Carnaval Group cu su Madness Band. Lo Sali di Ex-veld di Winston y lo termina na Fayang Restaurant. Ta cuminsa 8or di anochi. Esnan interesa pa participa por acudi cerca Dushi Carnival Group, bishita nan Facebook page y mira e deal great cu nan tin pa esaki.
SMAC ta invita un y tur pa bin apoya y presencia e actividadnan aki. Informacion di Parada di Mucha Oranjestad ta sigui.
